Publiká riba 03 Sèptèmber 2023
Willemstad – Minister Charles Cooper a reuní resientemente ku College Financieel Toezicht (CFT) pa interkambiá tokante fondonan pa por ehekutá e plan di mas aña pa mantenshon di kaminda, i desaroyo di e área di Rif i Colon.
Minister Cooper ta konsiente di e echo ku tin varios kaminda na Kòrsou ku tin mester di mantenshon. Pa e motibu aki, Minister a laga traha un plan di mas aña (MOP) pa atendé ku e problematika aki. Pa logra esaki, lo tin mester di fondo. Den e kuadro aki, Minister Cooper a reuní ku CFT.
Minister Cooper a presentá e plan i a palabrá ku:
– E plan aki ta un prioridat,
– Gobièrnu ta trahando riba un programa di invershon total pa pais (Nationale Investerings Agenda), i ku MOP ta forma parti integral di e esaki,
– Lo tin kolaborashon durante ehekushon di MOP ku tur ministerio envolví na momento ku ta konserni nan,
– Lo hasi uso di fondonan di belasting riba vehíkulo,
– Mester garantisá ehekushon di MOP,
– Mester reforsá Servisio pa Obra Públiko (OW) su kapasidat interno ku sosten di ‘Rijkswaterstaat’ i Ministerio di Infrastruktura i Maneho di Awa di Hulanda.
Tambe a trata e tópiko di desaroyo di e área di Rif i Colon. Diferente proyekto, tantu públiko komo priva, a keda ehekutá den área di Rif den e último añanan. Esaki ku e meta pa henter e área floresé. A interkambiá tokante e ròl di VVRP den desaroyo di maneho pa planifikashon urbano, identifikashon di posibel invershonistanan pa invertí den e área, un struktura di supervishon, i e kapasidat di ehekushon nesesario.
