Publiká riba 11 Febrüari 2025
Willemstad – Abase di e lei Vergunningslandsverordening (P.B. 2024, no. 78 (GT)), Ministerio di Desaroyo Ekonómiko (MEO) ta responsabel pa otorgá pèrmit di horeka. Pa hasi esaki MEO mester risibí konseho di Brantwer (pa loke ta trata kondishonnan pa salbaguardiá seguridat kontra kandela), Ministerio di Salubridat Públiko, Medio Ambiente i Naturalesa (GMN) (pa loke ta trata higiena i rekisitonan di e lokalidat) i tambe Polis (KPC) (pa loke ta trata orden públiko i investigashon di antesedente). Konforme artíkulo 33, insiso 2 di e lei aki, Polis tin un término legal di tres (3) siman pa duna konseho riba petishonnan pa pèrmit di horeka. Pa GMN i Brantwer no tin un término similar den e lei, lokual ta kousa retrasonan innesesario. Tin diferente motibu dikon e instansianan aki no ta logra duna konseho na tempu, kual MEO tin komprenshon pe, pero esaki pa años kaba a bin ta perhudiká e kliente i tambe kaha di gobièrnu.
E Vergunningslandsverordening ta un lei originalmente di 1963 i ta sumamente antikuá. MEO ta trahando riba un konsepto di lei modernisá pa e sektor di horeka ku pronto lo kuminsá kana su trayekto di lei. Ademas, entrante 15 di febrüari 2025, MEO lo implementá un término di tres (3) siman pa GMN i tambe Brantwer duna konseho riba petishonnan di pèrmit di horeka, ekivalente na e término legal ku ta konta pa Polis den e Vergunningslandsverordening. Meta di e medida aki ta pa resolvé e retrasonan den e proseso di otorgamentu di pèrmit di horeka na un forma struktural.
Konforme e maneho nobo aki, si MEO no risibí e konsehonan di e instansianan konserní den tres (3) siman, MEO lo otorgá e pèrmit basá riba informashon disponibel òf basá riba investigashonnan hasí. Sinembargo, tur e instansianan aki, tantu GMN, Brantwer i Polis, tin nan outoridat independiente pa kontrolá i sigurá kumplimentu ku regulashonnan relashoná ku seguridat kontra kandela, higiena i òrden públiko.
MEO ta konta ku kolaborashon di GMN, Brantwer i Polis pa kumpli ku e término di tres (3) siman pa duna konseho i pa asina mehorá e proseso di otorgamentu di pèrmitnan di horeka.
Aktualmente MEO ta hasiendo tur ehersisio nesesario pa atendé ku e retrasonan eksistente. Desde medio aprel 2025 Inspekshon Ekonómiko lo no permití pa lokalidatnan di horeka habri sin pèrmit. MEO lo perkurá pa tur kompania ku hasi petishon pa un pèrmit di horeka, risibí esaki denter di e término máksimo di 11 siman, despues di publikashon den korant, konforme e Vergunningslandsverordening. E término di 11 siman ta repartí di siguiente manera: despues ku e petishon pa un pèrmit di horeka keda entregá, i si esaki ta kompletu, e ta wòrdu públiká den korant. Despues di e publikashon aki, e petishon ta keda butá pa un término di dos (2) siman na Vergunningenloket pa tur ku kier wak esaki i entregá nan opheshon kontra di e petishon. Despues di e dos (2) siman, e petishon ta keda Vergunningenloket pa un (1) siman mas pa esun ku a hasi petishon pa e pèrmit di horeka, i tambe otronan, por tuma nota di e opheshon nan ku a keda entregá. Si tin opheshon a keda entregá, un investigashon mester wòrdu hasi den e bario kaminda ta skucha no ménos ku 6 di e habitantenan mas serka di e lokalidat di horeka. E resultado di e investigashon mester keda entregá denter di dos (2) siman na Minister di Desaroyo Ekonómiko, kende na su turno mester tuma un desishon riba e petishon denter di tres (3) siman. E término di tres (3) siman aki por keda alargá ku máksimo tres (3) siman mas. Esaki ta hasi e término total pa MEO otorgá un pèrmit di horeka 11 siman máksimo, òf den kaso ku no tin opheshon, nuebe (9) siman máksimo.
