Willemstad- Ku gran orguyo, Minister Cijntje i Ministerio di Desaroyo Ekonomiko (MEO) ta anunsiá lansamentu di e portal nobo: www.meo.cw. E lansamentu aki ta un logro signifikante sigur mirando e nesesidat pa tantu sentralisá komo amplia e informashonnan disponibel tokante desaroyo ekonómiko di Kòrsou i tokante e ministerio en general. E intenshon di meo.cw ta pues, pa hasi tur informashon tokante trabounan di e ministerio mas aksesibel pero e ta sirbi alabes komo un porta na informashon fásil, amplio i balioso tokante Kòrsou su desaroyo ekonómiko. Den e fase inisial aki e portal ta kompletamente na ingles, pero ta e intenshon pa pronto tur
informashon riba e portal ta aksesibel tambe na entre otro Hulandes i Papiamentu.
MEO tin diferente tarea i responsabilidat ku diariamente ta keda ehekutá di forma inkansabel ku e meta pa mira nos ekonomia floresé, sigui krese i duna fruta. Sin mas, den e tareanan aki tin kosnan ku tin biaha ta sosodé tras di kòrtina i ku hopi bia hende no sa di dje i tin trabounan tambe di nos ministerio ku kisas bo mes ke lesa mas a fondo di dje, pero sin sa na unda pa haña e informashon aki. Ku tur esaki den mente, MEO a desaroyá i lansa meo.cw. E portal ta repartí den entre otro e diferente tópikonan relevante relashoná ku e trabounan den e ministerio, e sektornan di enfoke i e produkto i servisionan ku e ministerio ta ofresé. Ku e meta pa fasilitá e búskeda di e usuario na e informashon deseá i hasi su bishita riba nos portal mas plasentero posibel.
Ku e informashon riba meo.cw, nos a pensa for di punto di bista di e invershonista, e empresario lokal, e siudadano ku djis ke sa un poko mas, e kolega den servisio públiko, i asta e studiante ku den kuadro di su estudio mester di un poko mas di informashon. Minister Cijntje i MEO ku plaser ta invitá bo pa bishitá e portal i konosé mas tokante nos esfuersonan kontinuo pa promové desaroyo ekonómiko duradero na Kòrsou.
