Riba dia di empresanan Mikro, Chikí i Mediano
Willemstad-Tur aña riba 27 di yüni, Nashonnan Uní ta selebrá dia di empresanan mikro, chikí i mediano. Aki na Kòrsou ta un echo, ku e sektor akí ya pa largu tempu kaba ta forma e wes’i lomba di nos ekonomia. E sektor di empresanan mikro, chikí i mediano ta akapará no ménos ku 98% di e total di empresanan na Kòrsou i ta sòru pa sigur 60% di nos kuponan di trabou. Mundialmente ku e sektor akí tin e potensial pa trese transformashon berdadero den ekonomia global, fomentá kreashon di mas empleo i promové kresementu ekonómiko, basta e empresario akí risibí e aporte i sosten nesesario. Ministerio di Desaroyo Ekonómiko (MEO) ta haña sumamente importante pa riba e dia akí, aun mas duna atenshon na kada empresario lokal ku ta kontribuí ku gran esfuerso i dedikashon na desaroyo ekonómiko di nos pais.
Dos aña despues di e pandemia di COVID-19 ainda tin diferente empresario den e sektor akí ta lucha diariamente pa salbaguardiá su soño. MEO ta haña sumamente importante pa, komo Gobièrnu, hasi esfuerso pa por yega mas serka di e empresario akí i komprondé mihó kiko ta su nesesidatnan, su eksperensianan diario i kiko tur e ta konfrontá. Netamente pa por logra esaki, Minister Cijntje, huntu ku MEO a duna inisio na e proyekto ‘Orea pa Empresario’ den Hòfi Popo Rojer dia 17 di yüni último, huntu ku empresarionan lokal di Bándabou i besindario. ‘Orea pa Empresario’ ta un di e esfuersonan pa duna mihó sosten i aporte na e sektor di empresanan mikro, chikí i mediano na Kòrsou. Dor di interkambiá personalmente ku e empresario, skucha ideanan, puntonan di mehoransa i hiba un kòmbersashon ku empresarionan lokal den diferente bario, e ministerio ta haña un mihó bista kon por sigui reforsá e sektor akí mihó i por desaroyá manehonan ku ta pas ku loke realmente ta biba den e sektor. Djamars, 27 di yüni awor, riba dia di empresanan mikro, chikí i mediano, Minister Cijntje i e tim di MEO lo ta den Freedom Hotel na Otrobanda di 6’or di atardi pa 8’or di anochi ku e siguiente edishon di ‘Orea pa Empresario’. Tur empresario den besindario ta mas ku bon biní. Pa partisipá na e seshon ta grátis.
Aparte di e proyekto ‘Orea pa Empresario’, MEO ta trahando tambe riba ‘Mi NEGOSHI Shared Services’. E ‘Mi NEGOSHI Shared Services’ lo wòrdu lansá pronto i e meta ta pa duna un mihó servisio na e sektor di empresanan mikro, chikí i mediano dor di krea un punto di kontakto regular físiko pa tur empresario kaminda por brinda ‘coaching’ i guia na e empresario a base di su nesesidatnan.
