Publiká riba 14 Yanüari 2026
Willemstad – Mi NEGOSHI Shared & Support Services (Mi NEGOSHI) ta wak bèk riba un aña 2025 signifikativo, kaminda a konsolidá su ròl komo un organisashon klave den desaroyo di negoshinan Mikro, Chikí i Mediano (MSME) na Kòrsou. Bou di mandato di Minister Roderick Middelhof i den estrecho koperashon ku Ministerio di Desaroyo Ekonómiko (MEO) i Stichting Beheer MKB Fondsen, implementashon real a keda marká pa medio di resultadonan ku por midi.
Mi NEGOSHI Shared & Support Services ta un inisiativa di Ministerio di Desaroyo Ekonómiko, ku a habri su ofisina ofisial pa empresarionan na desèmber 2024. Su meta prinsipal ta stimulá, guia i fortalesé empresarionan Mikro, Chikí i Mediano pa hasi negoshi di manera legal, strukturá i korekto, asina kontribuí na kresementu ekonómiko i kreashon di empleo.
Resultado i impakto den 2025
Durante aña 2025, Mi NEGOSHI Shared & Support Services a brinda sosten i guia un kantidat di 105 empresario riba nan ruta empresarial, variando di informashon i asesoría básiko te asesoria intensivo. Di e total, a yuda 46 empresario Mikro, Chiki i Mediano pa formalisá nan operashon, ku ta enserá registrá na Kámara di Komèrsio.
E distribushon di empresarionan pa fase empresarial tabata:
E sobrá ta empresarionan ku tin duda òf miedu pa dal e stap ofisial, òf ku ta den proseso di registrashon.
Guia i asesoría empresarial
Durante 2025, tabatin un kantidat di 96 trayekto di coaching, di kual 45 trayekto a finalisá kompletamente. Mi NEGOSHI ta konta ku sosten di 24 coach empresarial ku ta yuda den e proseso di asesoria. Mayoria di e trayektonan tin un durashon di 90 dia i tabata enfoká mas riba sosten struktural i duradero pa negoshi.
Empresarionan a risibí guia personalisá riba áreanan manera:
E demanda kontinuo pa sosten struktural i fundamental ta konfirmá e relevansia di Mi NEGOSHI su modelo di konseho práktiko, integrá i orientá riba resultado.
Training, workshop i desaroyo di kapasidat
Ademas di guia individual, Mi NEGOSHI a fasilitá 16 training i workshop durante 2025, ku un total di 302 partisipante. E seshonnan a wòrdu realisá den kolaborashon ku entrenadónan profeshonal i tabata enfoká riba fortalesé abilidatnan empresarial, edukashon finansiero i práktikanan komersial sostenibel.
Evento i konekshon empresarial
Un evento ku a sobresalí den 2025 tabata e selebrashon di Dia di Empresario, un momentu importante pa rekonosé i selebrá e aporte di empresarionan Mikro, Chiki i Mediano na Kòrsou, i pa fortalesé e konekshon entre empresarionan, stakeholders i partnernan.
Mirando pa dilanti den 2026
Pa 2026, Mi NEGOSHI ta prepará pa amplia su portofolio di servisionan, lansa instrumentonan digital nobo i sigui fortalesé e sektor di Empresanan Mikro, Chikí i Mediano. Importante ta e kontinuashon di kolaborashon ku Ministerio di Desaroyo Ekonómiko, kaminda lo sigui aliniá programanan ku prioridatnan di desaroyo ekonómiko di Kòrsou, fortalesiendo e impakto i aksesibilidat di sosten pa empresarionan lokal.
Mi NEGOSHI lo sigui mantené su kompromiso pa kontinuá ku training, workshop i asesoría práktiko, aksesibel i orientá riba resultado, kontribuyendo asina na mas kresementu, inovashon i sostenibilidat den e ‘eco-sistema’ empresarial di Kòrsou.
