Notisia

Kompetensia di arte pa e disiplinanan di kanto, baile i deklamashon

WILLEMSTAD – Ministerio di Enseñansa, Siensia, Kultura i Deporte (ESKD) a lansa e proyekto “Mi Talento pa Mi Pais na aña 2022.  “Mi Talento pa Mi Pais” ta un kompetensia di arte ku enfoke pa yuda forma artistanan patriótiko riba diferente disiplina di arte. E meta ta pa deskubrí talento skondí, stimulá patriotismo i salvaguardiá nos herensia kultural artísiko.

Pa aña 2023: “Mi Talento pa Mi Pais” ta enfoká riba tres disiplina di arte ku kompetensia di kanto, baile i deklamashon. E kompetensia akí ta kuminsá ku un ronda di oudishon, siguí pa diferente tayer ku tur talento ku klasifiká. Ta kulminá “Mi Talento pa Mi Pais 2023” ku un festival den kua ta saka e ganadónan. E premio mayó ta:  “e oportunidat pa tene un presentashon úniko di bo talento riba Plasa Brion, Dia di Bandera próksimo”.

Tur persona di henter Pueblo di Kòrsou den e kategoria di edat di 8-12 ,13-17 i 18+ por partisipá. Ta tene un oudishon den kada region di Kòrsou (P’ariba, P’abou, Meimei) i asina e aksesibilidat pa un i tur ta keda habrí. P’esei Ministerio di ESKD na nòmber di Gòbiernu di Kòrsou ta invitá pueblo kompletu pa ban sigui halsa nos nashon pa medio di arte. Pa mas informashon por bishitá e página di Facebook: Mi Talento pa Mi Pais òf por tuma kontakto ku Sektor di Kultura i Deporte via mail na mitalentopamipais@gmail.com òf yama na T: +599 9 695 1059 – t: +599 9  563 7369.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte