Gobièrnu di Kòrsou
Minister Cooper i minister America ta traha huntu pa desaroyá un kompleho pa hende grandi na Santa Rosa
Publiká riba
10 Sèptèmber 2025
Willemstad – Minister Cooper i Minister America ta anunsiá un proyekto importante pa promové bienestar di hende grandi na Kòrsou. Na momentu aki, ta den proseso pa buska lokalidatnan ku por adaptá pa krea un kompleho pa hende grandi.
Un di e lokalidatnan ku a wòrdú identifiká ta e tereno grandi den área di Santa Rosa, mas konosí komo e antiguo klooster “Regina Assumpta” di Broedernan di Dongen, ku mas promé a sirbi komo lokalidat di e èks-Departamentu di Enseñansa. E tereno aki ta mas o ménos 10.000m² i tin un edifisio riba dje ku tin un balor kulturál-históriko grandi.
Ministerio di Trafiko, Transporte i Planifikashon Urbano (VVRP) a pone e tereno na disposishon di SOAW den forma di un akuerdo di kolaborashon. Na manera aki, gobièrnu ta traha huntu pa duna un destino nobo na un tereno ku ta mei-mei di e komunidat di Santa Rosa.
SOAW tin planiá pa hasi un estudio tékniko ku ta pérmití desaroyá e kompleho pa hende grandi. E pensamentu ta pa usa e edifisio ku tin balor komo patrimonio komo e sentro di e kompleho, ku por sirbi komo kantor, espasio pa kome, i salon pa aktivitidatnan.
