Publiká riba 08 Òktober 2023
Willemstad – Minister Charles Cooper i Minister Plenipotensario sr. Carlson Manuel huntu ku su delegashon a reuní resientemente ku Ministerie van Binnenlandse Zaken en Koninkrijksrelaties (BZK) na Hulanda pa atendé e proyekto di bùsnan eléktriko pa transporte públiko pa Kòrsou.
Komo parti di e proyekto aki, Kòrsou sistema di transporte públiko lo ta unu ku ta bai traha estilo ‘Off-Grid’ kual ta unu úniko na mundu i por wòrdú usá komo “showcase” mundialmente. Esaki ta nifiká ku huntu ku Refineria Di Kòrsou su parke solar, e bùsnan eléktriko lo wòrdú karga pa medio di bateria. Tur esaki ku e meta pa alsa i optimalisa nivel di Kòrsou su transporte públiko i kontribuí na un medio ambiente mas limpi.
A reuní ku sr. ir. Roald Laperre, direktor general di Asuntunan di Reino Hulandes. Sr. Laperre ta presidente di e ‘Stuurgroep’ pa atendé ku finansiamentu di fondonan konosí komo ‘Nationaal Groeifonds’, ‘SDE++’, i Garantiefonds.
