Publiká riba 23 Febrüari 2024
Willemstad – Komo un paso importante pa fortalesé e sektor marítimo di Kòrsou, Minister Cooper di Tráfiko, Transporte i Planifikashon Urbano tabata tin un enkuentro produktivo ku representantenan di Curaçaose Maritieme Autoriteit (CMAR) i Curaçao International Financial Services Association (CIFA) riba 22 di febrüari último. E kombersashon, ku a trata desaroyonan den futuro di e sektor marítimo na Kòrsou, a keda risibí positivamente pa tur partido, durante kual a hasi adelantonan signifikante den e direkshon di puntonan di akshon konhunto.
Durante di e reunion, a atendé diferente strategia pa posishoná Kòrsou komo un ‘hub’ marítimo prominente den region. ‘E koperashon aki ta marka un momentu importante den nos esfuersonan pa stimulá kresementu ekonómiko di Kòrsou atraves di nos sektor maritmo’, Minister Cooper a deklará.
Tin un siguiente reunion planiá aki 3 luna pa atendé e desaroyonan i adelanto di e puntonan di akshon palabrá. Minister Cooper a enfatisá riba e importansia di kolaborashon i dialogo kontinuo entre CIFA, CMAR, i gobièrnu pa por alkansa e metanan.
