Publiká riba 26 Ougùstùs 2024
Willemstad – Riba djabièrnè 23 di ougùstùs den su funshon komo Promé Minister Interno, Minister di VVRP i Minister di Desaroyo ekonómiko a.i., Minister Charles Cooper ta tin e plaser di a topa ku Fabien Cousteau, Aquanaut i fundadó di PROTEUS™, huntu ku Proteus Ocean Group su tim ehekutivo.
Minister Cooper a risibi un relato kon e siman di trabou a bai ku tabata unu hopi ekstenso, pero tambe hopi fruktífero.
Gobièrnu tin un ‘Memorandum of Understanding’ (MOU) firmá ku Proteus Ocean Group pa fasilitá e proseso pa yega na e promé di e shete stashon espasial internashonal di oséano aki na Kòrsou.
PROTEUS™, dirigí pa defensor di medio ambiente Fabien Cousteau, ta un habitat supmarino modular ku lo wòrdu usa pa investigashon i eksplorashon marino, pero tambe lo brinda e servisio na NASA pa nan astronautnan, promé nan bai espasio, biba un temporada bou di laman den preparashon pa nan mishon.
Djabièrnè atardi e siman di trabou di Proteus Ocean Group a kulminá ku un reunion ku e grupo di trabou ku gobièrnu a instalá, ku tin representashon di kada ministerio i CINEX. E grupo di trabou aki ta reuní frekuentemente pa asina gobièrnu por fasilitá un proseso organisá ku lo hiba ku PROTEUS™ por desplegá na kosta di Kòrsou na 2027.
