Publiká riba 04 Sèptèmber 2024
Willemstad- Riba instrukshon di minister Van Heydoorn e komishon di klima na skol a sinta awe ku direktivanan di skol i sindikatonan tokante e situashon di kalor na skol. Komishon di klima na skol ta un komishon ku a haña enkargo di minister Van Heydoorn pa bini ku solushonnan duradero pa e problema di kalor eksesivo den klas ku ta surgi durante un periodo dado. Ehèmpel ta e dianan tras di lomba.
Na aprel último mesun grupo a sinta, na kual okashon a haña informashon di medídanan ku kada skol por tuma a korto plaso pa baha kalor na skol. Pa finansiá e medidanan akí skolnan por a hasi uso di un suma supstansial ku minister a depositá na S.O.S. pa keda repartí bou di e diferente direktivanan di skol.
Na e reunión di awe direktivanan di skol a kompartí ku otro koleganan kon kada unu a hasi uso di e sèn ku nan a haña. Tambe a kompartí otro medidanan ku no ta rekerí un suma grandi. Cooler, ventilator, plantashon di mata i tambe èrko tabata entre e medidanan ku direktivanan di skol a menshoná. Tin skol tambe ku a adaptá e tela di unifòrm di alumno.
Komishon di klima a partisipá ku nan ta konsiderá uso di split union den klas na e momentonan akí komo e solushon mas viabel pa e problema di kalor den klas. Mester traha si na un solushon pa e gastunan adishonal relashoná ku ahuste na e infrastruktura di koriente i tambe pa mas uso di koriente.
Tur direktiva di skol a skohe, den mesun liña di pensamentu ku e komishon, pa èrko pa nan skolnan. Pesei tambe aktualmente S.O.S. ta instalando un kantidat di èrko na skolnan na Kòrsou. E instalashon aki ta bai gradualmente, pero tur skol lo yega na bùrt. Minister mes no tin un ròl den eskoho di skol ni tampoko di e klasnan ku ta haña èrko. Esaki ta keda den man di direktivanan di skol. Na nòmber di minister e representante di OWCS presente, a anunsiá ku minister Van Heydoorn a logra di haña e aña akí tambe un suma di 1.5 miyon mas pa asina kontinua ku e proceso pa yuda kombatí kalor den klas.
Na final a palabrá ku lo bai studia e protokòl di kalor ku ta vigente na skolnan pa wak ku mester adaptá esaki. Partisipantenan a keda satisfecho ku e mainta i ku den un grupo asina por a kompartí ideanan pa mitigá kalor eksesivo na skol. A kumbiní pa bolbe reuní asina tin un motibu konkreto.
