Publiká riba 16 Yüli 2025
Hulanda, yüli 2025 – Den kuadro di e esfuerso kontinuo pa fortifiká koperashon internashonal i
intensifiká lucha kontra kriminalidat, Minister di Hustisia di Kòrsou, mr. Shalten Hato, a
realisá un bishita ofisial di trabou na Hulanda. Durante e bishita, ku tabata kargá ku reunionnan i
bishita stratégiko, e minister a topa ku vários outoridat i instansianan na Hulanda ku tin un ròl
importante den mantené órden públiko i lucha kontra krímen, spesífikamente ku énfasis riba
tráfiko di droga i kriminalidat organisá.
Koperashon ku konsulado di Colombia i El Salvador
Un di e puntonan prinsipal durante e bishita tabata e enkuentronan diplomátiko ku e kònsùlnan
di Colombia i El Salvador. E reunionnan tabata tin sigur un enfoke riba entre otro fortalesé
lasonan di koperashon ku e dos paisnan latinoamerikano, konsiderando ku hopi di e desafionan
na Kòrsou den tereno di kriminalidat tin su rais internashonal.
Colombia i El Salvador ta dos pais ku ta enfrentá su mes ku tema di kriminalidat organisá, i den
esaki nan ta desaroyando diferente táktika i método pa prevení i luchá kontra esei. Ámbos
kònsùl a ekspresá nan disponibilidat pa traha man ku man ku Kòrsou pa logra meta komun: un
region mas sigur i protehá.
Bishita na Haf di Rotterdam i tema di tráfiko di droga
Na Hulanda, Minister Hato a bishitá Haf di Rotterdam, un di e puerto mas grandi di Oropa, ku
tin un gran importansia den kadena internashonal di transportashon di karga.
Desafortunadamente, e haf ta ser usa tambe pa kriminalnan komo punto pa tráfiko ilegal di
droga.
Durante e bishita, e minister a haña presentashon detayá tokante e sistema sofistiká di kòntròl
ku e outoridatnan di duana i polis tin pa detektá i evitá importashon ilegal di supstansia prohibí.
E eksperensia den haf di Rotterdam ta sirbi komo modelo pa Kòrsou, unda tambe nos tin kòntròl
pa tráfiko di droga.
Driehoeksoverleg ku Polisnan na Rotterdam
Otro punto importante den e bishita tabata un driehoeksoverleg – un reunion tripartit entre
polis, ministerio públiko i outoridatnan lokal. Durante e tripartit, huntu ku miembronan di
Tim di maneho di Kuerpo Polisial Kòrsou a papia riba retonan ku na Kòrsou i Hulanda tin e
komun, i tambe kon ta hasi den prevenshon di kriminalidat.
Bishita na Apeldoorn: investigashon forénsiko i téknika moderno
Den kuadro pa fortifiká Kuerpo Polisial Kòrsou, Minister Hato a bishitá e siudat di Apeldoorn,
kaminda e la risibí splikashon kon nan ta reklutá polisnan, pero tambe nan “camera room”.
Durante e bishita a elaborá kon vigilansia ku camera a yuda i kon Kòrsou tambe lo sigui invertí
pa pone mas camera i asina oumentá visibilidat den kuadro pa yuda kombatí kriminalidat den
diferente forma. Durante e bishita, a tuma nota di teknologia moderno di VR ku agentenan
polisial ta usa pa trein i interkambiá ku otro.
Konklushon i próksimo paso
E bishita di trabou di Minister Shalten Hato na Hulanda a siña ku kooperashon internashonal,
interkambio di konosementu i uso di teknologia moderno ta esensial den lucha kontra
kriminalidat. E desaroyonan ku a surgi for di e enkuentronan lo sigui bira parte di un plan
stratégiko pa reforsá e sistema di hustisia kriminal den Kòrsou.
Na su regreso, Minister Hato lo presentá un rapòrt di evaluashon ku rekomendashonnan
konkret pa implementashon di algun di e práktikanan i téknikanan ku e a tuma nota di nan
durante e bishita. E desaroyo kontinuo di kapasidat lokal lo sigui tuma un lugá prominente den e
polítika di hustisia den Kòrsou, pa garantisá un komunidat sigur, di lei i di hustisia.
