Publiká riba 14 Mei 2019
Debí na e huida masal di estranheronan ilegal riba dia 8 di mei 2019 último, entrante 13 di mei 2019 Minister di Hustisia señor Quincy Girigorie, a instalá un Tim di Krísis pa Seguridat Integral (‘Crisisteam Integrale Veiligheid’) na SDKK (Sentro di Detenshon i Korekshon Kòrsou). E presidente di e tim señor B. Fredema MBA, sostené pa tres persona ku diferente ekspertisio lo ta enkargá ku seguridat integral di e instituto. E tim lo funshoná ku un nivel haltu di independensia den SDKK. En prinsipio ta instalá e tim di krísis aki pa un periodo di un luna ku e posibilidat pa prolongashon.
E tim di krísis aki lo ta spesífikamente enkargá ku evaluashon i optimalisashon di seguridat integral den i rondó di SDKK, lo hasi tur investigashon nesesario pa esaki i duna rekomendashonnan práktiko i organisatorio na Minister di Hustisia i Direktor di SDKK, señor Urny Floran. Ademas e tim lo duna rekomendashon di maneho pa loke ta trata seguridat di e instituto i e personal, tantu riba petishon komo riba propio inisiativa. Tambe e tim lo revisá i formulá regla i proseduranan di seguridat i ta enkargá pa raportá faktornan di riesgo pa loke ta trata seguridat i integridat di e personal. E tim tin outoridat pa hasi investigashonnan (di integridat) denter di SDKK i formulá rapòrtnan a base di esaki. Tur esaki den estrecho koperashon ku Bureau Interne Relatie na SDKK.
Entre otro e siguiente temanan lo keda evaluá: e instituto i su tareanan, guia i ‘coaching’ di personal i raportahe i atendementu ku insidentenan relashoná ku detenidonan i personal di e instituto. E presidente di e tim di krísis ta hasi e trabounan aki na nòmber di Minister di Hustisia i ta raportá tantu na Minister di Hustisia komo na Direktor di SDKK.
