Minister di Hustisia señor Quincy Girigorie lo ta den eksterior di djárason 14 di novèmber pa djadumingu 25 di novèmber 2018. E titular di Hustisia lo ta un di e oradónan di órden durante Asamblea General di Interpol i tambe lo enkabesá e delegashon di Reino Hulandes den e reunionnan ku e Komité kontra Tortura (Committee Against Torture CAT ) di Nashonnan Uní.
Asamblea General anual di Interpol
Minister Girigorie lo partisipá na e Asamblea General anual di Interpol ku lo tuma lugá di 18 pa 21 di novèmber na Dubai, United Arab Emirates. E Asamblea General lo tin komo temanan di mas importante: Fomentá inovashon den aplikashon di lei, konektividat polisial i koperashon den kombatimentu di terorismo, krímen organisá i “cybercrime“ (‘Fostering innovation in law enforcement, police connectivity and cooperation in combating terrorism, organized crime and cybercrime’). Den kuadro di e temanan aki durante di e Asamblea General, Minister di Hustisia di Kòrsou lo presentá komo un di e oradónan di órden, kaminda lo e elaborá riba pasonan ku Kòrsou a tuma pa kombatí krímen. Aki e lo para ketu entre otro riba e forma integral di trabou i ‘informatie gestuurd’ ku a keda formalisá den e Sentro di
Akshon Kòrsou.
Reunion ku Commission Anti Torture
Despues di su partisipashon na e Asamblea General di Interpol, minister Girigorie lo kontinuá su biahe pa Geneva, Suisa. Aki e titular di Hustisia, lo fungi komo hefe di delegashon di Reino Hulandes i alabes e lo representá Kòrsou den e di 65 seshon di CAT. Durante e seshon aki Reino Hulandes lo splika kon Hulanda, Kòrsou, Aruba i Sint Maarten ta implementando e Tratado di Nashonnan Uní en kuantu tortura i otro tipo di akto òf kastigunan kruel, inhumano òf indigno kontra e ser humano. Reino Hulandes ta forma parti di e tratado aki for di 1989 i kada 4 aña e tin e deber di reportá tokante e situashon na e paisnan ku ta forma parti di Reino. Minister Girigorie lo djòin e delegashon na Geneva riba dia 20 i 21 di novèmber.
‘Meld Misdaad Anoniem’
Finalmente den e último dianan di su biahe minister Girigorie lo hiba kombersashonnan ku e organisashon ‘Meld Misdaad Anoniem’ na Hulanda, kaminda lo papia riba formanan konkreto di koperashon pa implementá un inisiativa similar na Kòrsou.
Durante di e dianan di ousensia di Minister Quincy Girigorie, señora Minister Zita Jesus Leito (VVRP), lo ta enkargá ku e kartera di Hustisia.
