Publiká riba 08 Òktober 2025
Willemstad – Djamars 7 di òktober 2025 Minister di Desaroyo Ekonómiko a ofresé un almuerso na embahadornan i konsulnan general di Reino den nos hemisferio ku ta di bishita aki na Kòrsou. Durante di e almuerso a probechá pa profundisá riba temanan den e área ekonómiko i diskutí kon e embahadornan tambe por yuda identifiká oportunidatnan pa Kòrsou den e paisnan kaminda nan ta stashoná. Despues di un sukulento almuerso e bishitantenan a haña un rekorido den haf di Kòrsou kaminda nan a risibí un splikashon di e desaroyonan den haf i na 2BAYS. Minister Cooper i Minister Middelhof a kompañá e embahadornan durante e rekorido. Djaweps mainta lo tin un seminario pa duna un bista di Kòrsou su ambishonan ekonómiko i komersial.
