Publiká riba 23 Mart 2026
Willemstad – Minister di Desaroyo Ekonómiko (MEO), Roderick Middelhof, a dirigí un karta na agrikultornan di Kòrsou pa enfatisá e importansia di entregá informashon aktualisá tokante nan produkshon lokal. E karta aki ta parti di e esfuersonan pa yega na un sektor agríkola mas koordiná, transparente i efisiente.
Den e karta, Minister Roderick Middelhof, a ekspresá su apresio pa e trabou balioso ku agrikultornan ta hasi tur dia pa sostené nos komunidat, fortalesé nos seguridat di kuminda i kontribuí na desaroyo ekonómiko di Kòrsou.
Minister ta a indiká ku konforme e lei vigente, dispensashon pa importashon di produktonan agríkola lokal por wòrdu otorgá solamente ora ku produkshon lokal no ta sufisiente pa kubri demanda den merkado. Pa por evaluá petishonnan di importashon na un manera hustu i responsabel, ta nesesario pa MEO tin bista kla riba e produkshon lokal aktual.
Durante e último añanan, MEO a tuma diferente inisiativa pa organisá i fortalesé e sektor. Entre otro, a organisá seshonnan di informashon, hasi bishita na kunukunan, krea un grupo di komunikashon via WhatsApp i inisiá desaroyo di un aplikashon digital pa fasilitá planifikashon di produkshon. Sin embargo, den práktika no semper MEO ta risibí informashon kompletu i na tempu, loke por resultá den falta di produkto riba merkado i oumento di preshon pa konsiderá importashon.
Pa e motibu ei, MEO a tuma algun medida importante. For di awor, MEO lo tuma na kuenta solamente e informashon di produkshon di agrikultornan ku ta registrá na MEO. Ademas, agrikultornan mester manda nan informashon di produkshon por eskrito dos siman promé ku kosecha, sea via WhatsApp na +599 9 561 2415 òf via e-mail na info.kunukero@gov.cw.
Ku e medida nan aki, MEO kier yuda krea un sistema mas kla i efisiente, ku lo permití pa protehá agrikultornan lokal kontra importashon innesesario, sin pèrdè for di bista e nesesidat di garantisá ku pueblo tin sufisiente kuminda fresku disponibel.
Minister Middelhof a hasi un yamada na tur agrikultor pa sigui traha huntu ku MEO i pa kompartí informashon di forma struktural. Segun e minister, solamente ku bon komunikashon i koperashon por tin desishonnan balansá ku ta benefisiá tantu e produktor lokal komo e komunidat.
“Huntu nos por sigui fortalesé e sektor agríkola di Kòrsou i traha pa un futuro kaminda produkshon lokal ta un fuente importante di prosperidat, seguridat di kuminda i desaroyo ekonómiko pa nos isla,” segun Minister Middelhof.
