Publiká riba 18 Mart 2026
Willemstad – Ku sumo plaser Minister di Desaroyo Ekonómiko, Dr. Roderick Middelhof, ta anunsiá un logro mas kaminda a yega na akuerdo ku Belangenvereniging Curaçaose Agenturen (BVCA) pa instalá e dekreto di Makutu Básiko bèk pa un periodo definí di diesocho (18) luna.
Makutu Básiko konosé un historia largu i desafionan grandi manera demandanan den korte pa falta di diálogo ku partnernan den e sektor komersial di komestibel. Bou di liderazgo di Minister Middelhof a krea espasio pa tene kòmbersashonnan sano huntu ku BVCA kaminda a yega na akuerdo pa re-instalá e lei di Makutu Básiko temporalmente, miéntras Minister Middelhof i su tim di MEO ta traha riba un maneho di largo plaso mas balansá, ku ta protehé interes general i tambe interes di e komersiante. Ku esaki, Minister Middelhof ta sigurá kontinuidat, miéntras ku ta sigui traha riba un sistema struktural i duradero pa aksesibilidat na produktonan di primera nesesidat.
E konsepto pa re-instalá e lei di Makutu Básiko a haña konseho positivo di WJZ i aktualmente ta kanando su último kurso pa ser publiká i drenta na vigor.
Minister Middelhof ta yama danki na BVCA i tambe otro partnernan den e sektor komersial di komestibel kende a sigui tene preisnan faborabel asta despues ku e Makutu Básiko a vensé na Sèptèmber 2025. Esaki ta un ehèmpel di kon kolaborashon entre gobièrnu i sektor privá por trese resultadonan konkreto na benefisio di komunidat.
“Mi prioridat ta pa protehá e poder di kompra di nos pueblo. Ku e akuerdo aki nos ta garantisá produktonan básiko aksesibel miéntras nos ta sigui desaroyá un solushon struktural pa futuro,” segun Minister Middelhof.
