Registrashon a habri pa tur persona ku ke partisipá
Willemstad- Un i tur por kòrda e Marshe Sosial Ekonómiko, BETH, ku tabata keda organisá pa Ministerio di Desaroyo Ekonómiko i Fundashon Marshe. Aparte di e ambiente ku semper e marshe akí a sòru p’e den nos sentro di siudat i e atrakshon turístiko ku esaki a bira despues di tempu, BETH a logra tambe ku hopi di nos empresarionan mikro, chikí i mediano a haña e kurashi pa hasi nan negoshi stabil i duradero; kontribuyendo asina na desaroyo di nos ekonomia kreativo i e espíritu empresarial bou di nos hendenan ku ta ‘lora man’. Minister di Desaroyo Ekonómiko, Ruisandro Cijntje, huntu ku MEO i Fundashon Marshe ta mira e balor di inisiativanan manera esaki i p’esei BETH lo ta bèk, djasabra dia 2 di desèmber próksimo na Brionplein.
BETH ta para pa produktonan Barata, desaroyo Ekonómiko, desaroyo Turístiko i Habri kuponan di trabou. Den kuadro di e edishon spesial akí di BETH, Minister Cijntje, MEO i Fundashon Marshe ke invitá tur empresario mikro, chikí i mediano ku ta deseá di partisipá na BETH dia 2 di desèmber próksimo, pa registrá. Sea si bo ta traha pasapalo i kosnan di boka dushi, obra di man, produktonan natural, planta mata òf bo ta ofresé un servisio úniko, bo ta mas ku bon biní.
Registrashon pa partisipantenan ta habrí te ku djárason 15 di novèmber awor. Pa empresarionan ku lo ke habri un stènt pa bende kuminda durante BETH, tin un kontribushon di Fls. 125,-. Partisipashon pa tur demas partisipante lo ta grátis.
Pa registrashon por bishitá e siguiente lenk i yena e formulario https://bit.ly/RegistrashonBETH. Pa kualke pregunta òf informashon tokante e Marshe Sosial Ekonómiko-BETH, por manda un Whatsapp pa Fundashon Marshe durante oranan di ofisina na +599 9 511-1176.
