Notisia

WILLEMSTAD – Minister di Enseñansa, Siensia, Kultura i Deporte (ESKD) sr. Sithree van Heydoorn, ta ku biahe di trabou di 27 di òktober te ku 11 di novèmber próksimo. Minister van Heydoorn ta presente na ”Ministerieel Vierlanden Overleg” ( 4LO) na Hulanda. Durante di e reunion aki e 4 paisnan Aruba, Kòrsou, Hulanda i Sint Maarten ta hiba deliberashonnan, interkambia di konosementu, traha palabrashon konkreto i firma akuerdo riba temanan di interes komun relashoná ku Enseñansa, Siensia Kultura i Deporte. Alabes Miniter ta partisipá na e di 42 Konferensia General di UNESCO na Paris.

Meta di e enkuentro aki ta pa fortalesé e lasonan entre e paisnan, sostené i fortifiká otro den e diferente trabounan, yega na solushon konhunto pa retonan ku e paisnan den Reino ta konfrontá. Alabes ku e vishon pa sigui mehorá kalidat di enseñansa i brinda mihor oportunidat na e komunidatnan, i intensivá kolaborashon riba tereno di Enseñansa, Kultura i Siensia den Reino Hulandes.

Huntu ku su delegashon, Minister ta tene diferente reunion relashoná ku tópikonan manera herensia kultural, guia di studiante, alohamentu (huisvesting) di studiante i mas. Tur ta enkuentronan ku diferente partidonan importante na Hulanda (stakeholders). E programa di “Ministerieel Vierlanden Overleg”, ta inkluí seshonnan krusial di paisnan den Reino, i ta kulminá den firmamentu di diferente akuerdo, ku énfasis riba enseñansa i kultura.

Na Paris durante e di 42 Konferensia General di UNESCO, Minister di ESKD sr. Sithree van Heydoorn ta tene un diskurso pa tur e paisnan presente, pa asina duna un relato riba e último desaroyonan na Kòrsou. Esaki ta relashoná ku tópikonan manera, edukashon, kultura, kambio di klima, deporte, programa di herensia di sklabitut i digitalisashon.

Dor di partisipá na e aktividatnan aki Minister van Heydoorn ta representá nos pais di forma digno i sigui traha pa yega na resultadonan konkreto ku ta kontribuí na desaroyo di Kòrsou.

—
KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte