Publiká riba 23 Òktober 2017
Willemstad-Port-au-Prince-Sunrise Airways 23 novèmber próksimo lo lansa su promé buelo komersial pa Kòrsou. Nan lo bula e ruta Port Au Prince–Kòrsou–Port Au Prince ku un Airbus A320 ku ta akapará 150 pasahero. Den e mishon eskplorativo pa Haiti, ku a tuma lugá den ougùstùs último, organisá dor di Ministerio di Desaroyo Ekonómiko huntu ku Curinde i Sunrise Airways a sali na klá ku tin un demanda grandi pa reapertura di e ruta aki.
E yegada di Sunrise Airways ta algu sumamente positivo pa ekonomia di Kòrsou pasó e lo stimulá turismo i spesialmente nos komersio den zona franca. E Merkado di Haiti ta unu hopi importante pa e sektor di zona franca pasó e ta stimulá eksportashon i trese divisanan. Den pasado Kòrsou tabata disfrutá di e frutanan ku e sektor aki tabata produsí for di e merkado di Haiti. Debí na sirkunstansianan e konekshon a kai afó i pa e motibu aki e merkado a baha drástikamente.
Ku yegada di Sunrise Airways ta spera ku e sektor aki lo krese bèk progresivamente. Esaki sigur lo ta un kontribushon positivo pa por yuda boost nos ekonomia.
Sunrise Airways ta un kompania di Haiti, ku tin 7 aña ta operando den e mundu di aviashon. Aktualmente nan ta bula destinashonnan den Karibe manera Haiti (Cap Haitian, Port-au-Prince ), Cuba (Havana, Santiago de Cuba) i Repúblika Dominikana ( Santo Domingo).
Sunrise Airways ta sigur un kompania prominente ku ta ekspandé su destinashonnan strategikamente den Caribe. Nan plannan den futuro serkano ta, pa bula destinashonnan manera Merka (Miami, Orlando, Fort Lauderdale), Jamaica (Kingston), St Maarten, Bahamas (Nassau), Curaçao, Aruba, Guadeloupe i the Turks &Caicos.
Ta e intenshon ku pa luna di desèmber Sunrise Airways lo kuminsá bula tambe Santiago de Cuba – Kòrsou – Santiago de Cuba.
Sunrise Airways su itenirario ta sigur un logro mas pa Kòrsou.
Kòrsou pabien!
