Publiká riba 04 Sèptèmber 2017
Ayera den transkurso di dia a hala atenshon di Minister Zita Jesus-Leito i Domeinbeheer pa ku e estado di e edifisio bieu di Finansa na Concordiastraat, nèt dilanti di Bestuurscollege (BC) bieu. A duna remarke speshalmente riba e echo ku tin varios dokumento di atministrashon den e edifisio ku ta eksponé pa bista di personanan ku pasa den besindario. E motibu di esaki ta un buraku grandi ku deskonosínan a traha den muraya di e edifisio en kuestion. Mesora Minister Jesus-Leito konhuntamente ku Domeinbeheer a tuma akshon di forma desidido pa trese kambio den e situashon aktual.
Aktualmente tin un tim hasiendo limpiesa alrededor di e edifisio bou di enkargo di Domeinbeheer. Lo destruí e dokumentonan menshoná konforme prosedura di gobièrnu.Despues di e limpiesa lo saka tur dokumento for di e edifisio i sera e buraku den muraya i tambe tur entrada pa evitá ku malechornan lo sigui shusha i hasi mal uzo den futuro.
Domeinbeheer tin un departamentu speshal ku ta enkargá ku mantenshon di edifisionan di gobièrnu. E departamentu aki ta enkargá ku kontròl, restourashon, inventarisashon, registrashon i tasashon di tur e edifisionan aki. Di e forma aki Domeinbeheer ta monitoreá e edifisionan i alabes traha riba e maneho ku ta stipulá uzo di kada edifisio di gobièrnu.
