Publiká riba 17 Novèmber 2024
WILLEMSTAD – Ademas di organisá “Upskill Curaçao” pa fortalesé e abilidatnan di e empleadonan riba nos isla, Ministerio di Desaroyo Ekonómiko ta kontinuá ku un otro inisiativa pa sostené negoshinan lokal den e desaroyo di nan kapasidatnan operashonal. “Gov2Biz & Biz2Biz” den e kaso akí lo enfoká riba e uso di teknologia i práktikanan sostenibel pa yuda empresarionan lokal baha nan gastu i mehorá nan efisiensia. E evento akí tambe ta forma parti di e programa di Landspakket ku tin komo meta redusí gastu i stimulá kresementu ekonómiko pa Kòrsou.
Gov2Biz & Biz2Biz
“Gov2Biz & Biz2Biz” lo tuma lugá dia 20 di novèmber 2024 di mitar di 3 (2:30 PM) pa mitar di 9 (8:30 PM) na Chateau Post 5, na e edifisio di PWFC. Durante e seshonnan, representantenan di Lokèt Digital, Mi Negoshi Support i Inspekshon di MEO lo demostrá e servisionan digital mas nobo ku Gobièrnu ta ofresé pa sostené empresanan.
E evento lo inkluí tambe historianan di éksito di empresarionan lokal ku a logra éksito na Kòrsou pa medio di inovashon teknológiko i práktikanan di sostenibilidat. Entre e oradornan lo tin Osferney Nahr ku lo kompartí informashon tokante e transformashon digital di e industria di taxi, i Dòkter Severing ku lo demostrá kon teknologia por mehorá servisio di kuido di salú na nivel lokal. Botika di Servisio tambe lo demostrá kon nan ta hasi uso di inteligensia artifisial den botikanan, i Sovena Sales and Service lo mustra e benefisionan di energia solar i lusnan LED pa bahamentu di gastu.
Otro oradornan ku lo hiba palabra durante e evento lo ta Somesh Nagdev, CEO di Galvan Group, ku lo trata e benefisionan di teknologia pa kresementu di negoshi, i Klarvin Cijntje di Spar Awa Solutions, ku lo duna informashon riba téknikanan pa spar awa den agrikultura. Partisipantenan lo tin e oportunidat pa interkambiá ku lidernan di industria i ekspertonan di reklutashon, kombertiendo e evento akí den un paso importante pa mehorá e kapasidatnan di trahadónan na Kòrsou.
E evento lo finalisá ku un Networking Hour ku lo duna e partisipantenan oportunidat pa konektá ku otro empresarionan i ekspertonan pa interkambiá ideanan i pa netwerk.
E evento aki ta organisá den kuadro di Global Entrepreneurship Week, den kolaborashon ku Ministerio di Asuntunan Interno i Relashonnan di Reino. Tantu “Gov2Biz & Biz2Biz” i “Upskill Curaçao” ta demostrá e kompromiso di Ministerio di Desaroyo Ekonómiko pa stimulá kresementu ekonómiko dor di mehorá e abilidatnan di nos profeshonalnan i hasi nan mas resiliente. Esaki dor di duna sosten na negoshinan lokal den nan transformashon digital i práktikanan sostenibel.
Ministerio di Desaroyo Ekonómiko ta invitá tur empresario i futuro empresarionan pa partisipá na e evento akí i forma parti di e movementu pa hasi Kòrsou mas fuerte i sostenibel. Pa registrashon skèn e QR-code athunto.
Si bo tin pregunta òf ta deseá mas informashon por tuma kontakto libremente na E63digital@gmail.com.
