Publiká riba 19 Novèmber 2024
WILLEMSTAD – Ku satisfakshon Ministerio di Desaroyo Ekonómiko ta mira bèk riba e eksitoso seshon di ‘Upskill Curaçao’ ku a tuma lugá djasabra 16 di novèmber último na World Trade Center Curaçao, komo parti di e SCFC Job Fair.
Upskill Curaçao a duna e partisipantenan informashon balioso tokante e profeshonnan di futuro i e abilidatnan ku ta nesesario pa ekselá den e diferente sektornan di e ekonomia di Kòrsou. Meta di e evento tabata pa informá profeshonalnan tokante e posibilidatnan di kursonan, tantu lokal komo online, ku por yuda nan pa sigui desaroyá nan mes i nan karera.
Tópikonan sobresaliente di e evento
Durante di e evento a trata e tópiko di importansia di un bon CV. Sumy Wiels, un consultant di reklutashon di Tempo, a duna tep riba kon por pone un CV sobresalí, ku énfasis riba abilidatnan, teniendo kuenta ku privasidat di informashon personal. Gilly-ann Crichlow i Daniel Jansen, consultant nan di reklutashon di Balance Recruitment a duna informashon tokante tendensianan di merkado i importansia di tin un meta kla. Twinkle Mathew, Vise Presidente di ISACA a splika kon sertifikashon por oumentá konfiansa propio, kredibilidat i tambe kontribuí na un mihó salaris. Elegemary Martes di Sandals a kompartí su trayektoria di F&B Server pa Learning & Development Manager, i el a mustra kuantu oportunidat amplio e sektor di hospitalidat ta brinda. Konseheronan di Balance Recruitment tambe a elaborá riba e importansia di networking pa logra un kambio eksitoso di karera.
Invitashon pa partisipá na ‘Gov2Biz & Biz2Biz’
Despues di eksitoso evento di ‘Upskill Curaçao’, Ministerio di Desaroyo Ekonómiko ta ekstendé un invitashon kaluroso na tur empresario i futuro empresarionan pa partisipá na e di dos edishon di ‘Gov2Biz & Biz2Biz’ ku lo tuma lugá dia 20 di novèmber próksimo di mitar di 3 di atardi (2:30 PM) te mitar di 9 di anochi (8:30 PM) na Chateau Post 5 (edifisio di PWFC). E evento akí organisá den kuadro di Global Entrepreneurship Week, lo ta dirigí riba uso di solushonnan digital i sostenibel pa baha gastu i mehora efisiensia di negoshinan lokal.
Por registrá via di e QR-code athunto. Pa mas informashon por tuma kontakto ku nos libremente via E63digital@gmail.com.
