Publiká riba 27 Novèmber 2018
Willemstad – Pa motibu di situashon ahigiéniko enkontrá awe durante kontròl na un establesimentu ku ta traha blòki di eis marka PURE ICE, Ministerio di GMN a konkluí ku no ta responsabel pa bende tampoko konsumí e eis aki. E establesimentu no tabata konosí tampoko registrá na Ministerio di GMN komo kompanía ku ta traha tampoko bende eis (awa konhelá) pa konsumo i komo tal nunka no a pasa e pruebanan higiéniko nesesario pa por garantisá e kalidat nesesario.
E investigashonnan ta kontinuá, pero mirando ku ta trata di un tipo di produkto (awa konhelá) ku ta wòrdu utilisá ku hopi regularidat, for di aworaki Minsterio di GMN ta atverti pa no uza e produkto aki (eis marka PURE ICE) i hibé bèk kaminda a kumpr’é òf deshasí di dje.
Tur establesimentu ku ta bende òf sirbi eis marka PURE ICE ta wòrdu atvertí pa stòp benta di esaki inmediatamente.
