Publiká riba 29 Sèptèmber 2025
Willemstad – djaluna 29 di sèptèmber 2025 Ministerio di Hustisia a habri Siman di Kultura den un ambiente amikal ku diferente presentashon. E Sekretario General di Ministerio sra. G. den der Gen a habri ku palabra di apresio, sigui ku un diskurso di Minister Shalten Hato, ku a enfatisá riba e importansia di kultura den formashon i unidat di komunidat.
E programa tabata riku den eksperensia:
– Sra. Angelique Klooster a deleitá ku algun kantika.
– Sr. Marvin Snijders a splika tokante instrumento tradishonal ku ta fundamental den nos kultura.
– Sra. Eduarda de Bies a trese un presentashon tokante baile kultural, spesialmente e orígen di paso básiko di seú. E mes a duna un demostrashon práktiko i huntu ku e empleadonan a pone esaki mesora den prátika.
Ku entusiasmo i partisipashon aktivo, Ministerio di Hustisia a habri Siman di Kultura den un manera ku ta reflehá nos kompromiso pa preservá i transmití nos tradishon na generashon di awe i mañan.
