Publiká riba 04 Novèmber 2025
Willemstad, 4 di november 2025 – Ministerio di Hustisia a tuma nota di e desishon di Korte di Promé Instansia di Kòrsou (ECLI:NL:OGEAC:2025:222) tokante e ubikashon ilegal di un menor di edat den sekshon sera di e Instituto Hubenil Hudisial di Kòrsou (JJIC).
Korte di Hustisia a konsiderá ku e kolokashon di e menor den sekshon será di JJIC, ku ta igual ku restrinshon di libertat, a tuma lugá sin ku tabata eksistí un base legal sufisiente pa esaki. Ministerio di Hustisia ta lamentá hopi e situashon akí.
Ounke e falta di personal den e kadena hustisial ta sigui ta un desafio konstante, esaki nunka por sirbi komo un hustifikashon pa no kumpli ku e normanan legal vigente. E ministerio ta rekonosé ku Gobièrnu tin un obligashon pa kumplí estriktamente ku e disposishonnan di e Tratado Europeo di Derecho Humano (EVRM) i e Tratado Internashonal tokante Derecho di Mucha (IVRK).
Komo reakshon na e desishon aki, medidanan korektivo ya a wordu implementá i e proseduranan interno a wòrdu adaptá pa garantisá ku un situashon asina lo no ripití den futuro. Ademas, e ministerio ta prepará pa un mehorashon struktural pa abordá e problemátika hubenil, enfoká riba intervenshon sostenibel i adaptá na e nesesidatnan individual, kaminda e derecho i bienestar di e mucha ta keda sentral.
Ministerio di Hustisia ta kontinuá I ta komprometé su esfuerso pa un ehekushon legal, kuidadoso i orientá riba e mucha di e medidanan di protekshon hubenil na Kòrsou.
