Notisia

Riba djamars 5 di febrüari último, ministernan Eugene Rhuggenaath, Kenneth Gijsbertha i Marilyn Alcalá-Wallé a reuni ku representantenan di sindikato SITEK for di 8 or di mainta den forma maratóniko, ku un interupshon kòrtiku pa buska algun dokumento pa despues sigui ku e reunion ku minister Alcalá-Wallé te atardi lat pa kaba di atende e puntonan di preokupashon huntu ku representantenan di SITEK.

Despues a sigui un reunion interno den seno gubernamental ku a finalisá den oranan lat anochi. E dokumento final ku e proposishonnan a keda mandá tantu pa SITEK komo pa Konseho di Minister.

SITEK a duna di konosé ku e mester repasá e dokumento internamente. 

E proposishonnan ku na e momentonan aki ta riba mesa ta e.o.:

1. Dosentenan di VSBO ta bai duna menos ora di lès, saliendo di 32 i bira 27 ora pa siman;
2. Dosentenan A ku tin 5 aña den funshon outomátikamente ta bai B, nifikando ku banda di ku nan ta sali di un skal salarial drenta un skal salarial mas haltu, nan ta haña un promoshon èxtra di 2 trapi salarial den e skal nobo ku nan drenta;
3. Personal di sosten den enseñansa ku aworaki tin entre 19-25 dia di vakashon ta haña 38 dia di vakashon;
4. E limpiesa na skolnan (banda di e sanitarionan ku ya kompanianan mester limpia ya kaba tur dia) mester tuma lugá den tur lokalidat tur dia;
5. E sektor di Enseñansa mester keda tratá komo un sektor separá ku kondishonnan speshal pa personal den enseñansa;
6. Pone fecha nobo pa e otro puntonan di akshon di e Convenant.

Gobièrnu ta atendé e dokumento aki internamente i alabes ta warda riba reakshon di SITEK riba e dokumento menshoná.

 ********************************************************************************

MAS NOTISIA

Ministerio konserní: Enseñansa, Siensia, Kultura & Deporte