WILLEMSTAD – Curaçao Music Export Office den kolaborashon ku Ministerio di Desaroyo Ekonómiko i CINEX, resientemente a hiba 3 producer lokal, bibá na Kòrsou, Atlanta den kuadro di MOBO Music Mission 2024. E mishon akí a wòrdu organisá entre otro dor di Henca Maduro, Gobièrnu Hulandes, Dutch Music Export, Buma Stemra i Fonds Podiumkunsten di Hulanda.
Durante di e biahe akí Hulanda i Kòrsou, komo Reino Hulandes, a trese varios songwriter i producer huntu pa asina nan kolaborá i krea músika ku songwriter, producer, A&R managers i artistanan Merikano.
A kolaborá entre otro ku Troy Taylor, Masspike Miles, Inigosane, Kai Ca$h i hopi mas. Tambe a hiba kombersashonnan fruktífero ku kasnan diskera manera QC, Ear Drummers i Generation Now.
Kònsùl General di Reino Hulandes, sr. Jaap Veerman, a ekspresá deseo pa kontinuá ku inisiativanan manera esaki i pa sigui bai Atlanta pa krea mas hit i haña mas ’placements’ serka artistanan renombrá na Merka.
Curaçao Music Export Office a keda lantá na mei último dor di Ministerio di Desaroyo Ekonómiko pa fasilitá nos músiko- i artistanan riba nan trayekto pa internashonalisá nan talento musikal. E ofisina ta situá den MEO den e divishon di Koperashon Ekonómiko Internashonal.
Djasabra awor 9 di novèmber 2024, Curaçao Music Export Office ta organisá un kurso yamá “Zoné”, ku ta ofresé e oportunidat na esnan interesá den internashonalisá nan músika i talento, pa partisipá. E kurso ta grátis i ta tuma lugá di 1’or di mèrdia pa 6’or di atardi na Amazia.
Sigui Curaçao Music Export Office riba Facebook i Instagram pa keda na altura di desaroyonan.
