Willemstad – Den e último añanan, nos a mira un kresementu signifikante den turismo di Kòrsou. Esaki ta trese kuné ku ultimamente tin un demanda haltu pa pèrmitnan di standplaats kantu di òf riba playanan públiko di personanan ku kier ehersé aktividatnan komersial manera entre otro benta di kos di kome i di bebe i tambe hürmentu di artíkulonan di watersport manera stul, parasol, duikbril, ets.
Aktualmente Ministerio di Desaroyo Ekonómiko no tin un maneho stipulá pa standplaatsnan na playanan públiko manera ta e kaso pa standplaats den sentro di siudat i pafó di sentro di siudat. E petishonnan ku keda entregá pa standplaats na playanan públiko, aktualmente ta keda evaluá konforme e maneho di standplaats pafó di sentro di siudat pa motibu ku no tin un maneho delineá pa standplaats kantu di òf riba playanan públiko. Un maneho apart pa standplaats kantu di òf riba playanan públiko ta deseabel teniendo kuenta ku e kriterianan den e maneho di standplaats pafó di sentro di siudat no ta kompletamente aplikabel riba standplaatsnan na playanan públiko.
Despues di a konsultá ku Konseho di Minister, Minister di Desaroyo Ekonómiko a tuma e desishon pa instalá un moratorio temporal di seis luna pa standplaats na playanan públiko pa asina duna tempu na Ministerio di Desaroyo Ekonómiko en konhunto ku Ministerio di Salubridat Públiko, Medio Ambiente i Naturalesa (GMN), Ministerio di Tráfiko, Transporte i Planifikashon Urbano (VVRP) i tambe otro instansianan konserní, pa analisá e situashon aktual na playanan públiko i delineá un maneho pa standplaats na playanan públiko. E moratorio aki ta aplikabel riba tur petishon pa un pèrmit di standplaats kantu di òf riba playanan públiko despues di 4 di yüli 2025.
Apesar ku e maneho di venten (kana òf kore ku un vehíkulo bende produkto òf duna servisio) ta stipulá ku no ta pèrmití pa vènt riba playanan públiko, Ministerio di Desaroyo Ekonómiko a tuma nota tambe di un oumento den personanan ku kier un pèrmit pa vènt kantu di playanan públiko. E moratorio aki ta konta tambe pa petishonnan pa un pèrmit di vènt kantu di playanan públiko teniendo kuenta ku esaki tambe ta urgi regulashon.
E moratorio aki lo duna espasio pa prepará un maneho kla i spesífiko pa playanan públiko, inventarisá i identifiká unda standplaats i aktividatnan di vènt ta permití na playanan públiko, determiná e kondishonnan i restrikshonnan i tambe garantisá ku e maneho ta reflehá sostenibilidat ambiental, turismo i interes lokal.
Ministerio di Desaroyo Ekonómiko ta pidi komunidat su indulgensia i komprenshon den e fase aki pa asina yega na un maneho regulá pa nos playanan públiko.
