Publiká riba 01 Ougùstùs 2024
WILLEMSTAD – Minister di Enseñansa, Siensia, Kultura i Deporte (ESKD) sr. Sithree van Heydoorn a anunsiá na personal ku entrante promé di ougùstùs 2024, sra. Nihayra Leona ta bira e direktor na Servisio di Skolnan Públiko (Dienst Openbare Scholen (DOS)). Esaki a bai di forma personal i via di koreo elektróniko pa tur trahadó di e servisio.
Durante di un enkuentro ameno minister a hasi e anunsio i Sekretario – General di ministerio sra. Susan Larmonie – van Heydoorn tambe a hiba palabra na e personal. Minister di ESKD i Sekretario – General a gradisí i yama sra. Irelnety Copra danki pa e pas i trankilidat ku a bin den e organisashon pa e periodo ku e fungi komo direktor interino.
Sra. Nihayra Leona komo direktor a presentá un parti di su vishon i tene un presentashon ku un introdukshon kòrtiku di su persona komo profeshonal. Un di su prioridatnan ta pa pone atenshon na personal i pa traha huntu ku e tim di DOS pa un mihó enseñansa. Tambe e la presentá un parti di su formashon den enseñansa kaminda el a informá ku e ta sikólogo di mucha spesialisá den sikologia na skol, e tin su maestria den “ontwikkelingspsychologie”, a hasi vários investigashon relashoná ku e tema di idioma i aktualmente e ta trahando riba su PhD.
A la bes e a splika ku e maneho ku e ta hiba ta di diálogo, komunikashon habrí, rèspèt mutuo, ta reta otro pa sigui siña, ta apresiá inisiativa, ta pusha pa ekselensia i inovashon, koperashon, kolaborashon i profeshonalisashon. Despues a sigui ku e parti di pregunta. Kaminda minister a duna tur personal i prensa presente oportunidat pa hasi pregunta i a kontestá tur e pregunta nan.
Por mira bèk riba un aktividat positivo kaminda minister di ESKD sr. Sithree van Heydoorn a deseá e direktor nobo tur klase di éksito.
—
KOMUNIKASHON
Pa mas potrèt por bishitá: Direktor na Servisio di Skolnan Públiko
