Publiká riba 30 Yüni 2025
Willestad, 30 di yüni 2025 – Gobièrnu di Kòrsou ta ser formá dor di Rei Willem-Alexander di Reino Hulandes i e ministernan di Kòrsou. E Rei ta keda representá den e gobièrnu di Kòrsou dor di e Gobernador di Kòrsou. Den e ròl ei, no ta e, sino e ministernan di Kòrsou, ta polítikamente responsabel na parlamento di Kòrsou (Staten). Tambe Gobernador ta e representante di gobièrnu di Reino i presidente di Konseho Konsultativo di Curaçao (“Raad van Advies”). Den Reino Hulandes tin eksigensianan haltu pa ehersé e funshon di Gobernador, manera entre otro kompetensia atministrativo, integridat, envolvimentu i abilidatnan sosial.
E aktual Gobernador, Sra. L.A. (Lucille) George-Wout, a fungi komo Gobernador di Kòrsou durante e último diesdos añanan i lo tin ku haña un susesor entrante 4 di novèmber 2025. Den e kuadro aki Konseho di Minister di Reino a aprobá awe e nombramentu di Sr. M.J. (Mauritsz) de Kort, di 51 aña di edat, komo e próksimo Gobernador di Kòrsou. Sr. de Kort lo tuma e enkargo over di Sra. Lucille George-Wout entrante 4 di novèmber 2025. E periodo di nombramentu di un Gobernador ta pa seis aña. Despues di e periodo aki e por keda nombrá un biaha mas pa un periodo máksimo di seis aña.
Sr. Mauritsz de Kort a kuminsá su karera komo abogado na Kòrsou, Sint Maarten i Aruba i a práktika komo tal te ku 2007. For di 2011 e ta trahando komo hues na Korte Komun di Hustisia di Aruba, Kòrsou, Sint Maarten i di Boneiru, Sint Eustatius i Saba, despues di e estudio pa bira hues di 2007 pa 2011. Di 2017 pa 2022 Sr. de Kort tabata, banda di hues, miembro di e direktiva di Korte Komun di Hustisia i den e funshon ei Sr. de Kort a fungi komo visepresidente pa e filialnan di Korte Komun di Hustisia na Kòrsou i Boneiru. For di 2022 Sr. de Kort a keda nombrá komo presidente di Korte Komun di Hustisia. Durante su trayektoria Sr. de Kort a okupá diferente funshon den direktiva di organisashonnan kultural i sosial na Kòrsou i Sint Maarten.
Na nòmber di Konseho di Minister di Kòrsou, Promé Minister Gilmar Pisas ta felisitá Sr. Mauritsz de Kort komo futuro Gobernador di Kòrsou i ta dese’é sabiduria i éksito pa e ehersé su tarea nobo. Na mes momento, Promé Minister Pisas ta gradisí Gobernador aktual, Sra. Lucille George-Wout, pa e forma digno ku Sra. George-Wout a sirbi nos pais i e pueblo di Kòrsou durante e último diesdos añanan.
