Publiká riba 04 Sèptèmber 2017
Relashoná ku inisio di e periodo di orkan, Obra Públiko a tene un seshon di informashon pa personal di tur su departamentunan. E seshon a trata preparashon i e forma di atendé na momentu ku Kòrsou ta eksperensiá un kalamidat ku tin influensha riba nos infrastruktura.
Durante e seshon, Obra Públiko a introdusí esnan responsabel pa ESF3 ku ta sr. Jairo Silberie komo kordinadó, sra. Denise Lobo-Pieters i sr. Ursel Cordilia. ESF 3 ta para pa Emergency Support Functions 3, ku ta e unidat, banda di 8 otro unidat den e struktura di kombatimentu di kalamidat na Kòrsou, ku entre otro ta soru pa infrastruktura i shelternan. Tambe a splika tareanan i e maneho ku e unidat ta apliká na momentu ku tin un suseso ku tin un karakter di kalamidat.
E kordinadónan di ESF 3 a traha i entregá un revishon di e plan di maneho di krísis i kalamidat pa ESF 3 na direktor di Obra Públiko, sr. Urvin Batta. Esaki ta un plan básiko .E intenshon ta pa sigui aktualisá i amplia e plan aki regularmente.
