Notisia

Minister Sithree van Heydoorn ta tuma desishon pa subi supsidio na muchanan entre e edat di 0 pa 4 aña ku ya a bini na remarke pa esaki.

WILLEMSTAD – Gobièrnu tin komo meta e tarea prinsipal i primordial pa pèrkurá pa tur mucha na Kòrsou di 0-4 aña haña edukashon pre-eskolar kualitativo. Ta sientífikamente probá ku e edat di nos muchanan entre 0-4 ta krusial pa su desaroyo pa e tin un bon konekshon pa yega enseñansa di fundeshi. Dos di e instrumentonan ku gobièrnu tin pa hasi esaki ta atendé ku e supsidio na suheto (e mucha) pa un kantidat di mucha (Subjectsubsidie) i kontinuamente vigilá, aportá i mehorá kalidat di e sentronan pre-eskolar. Tambe ta asina ku kosto di bida a subi konsiderabel pa henter komunidat, inkluyendo sentronan pre eskolar.  Konsiderando e dos puntonan akí i relashoná ku e maneho di edukashon pre-eskolar, minister di Enseñansa, Siensia, Kultura i Deporte (ESKD) sr. Sithree van Heydoorn, via di Sektor di Kultura i Deporte (SKD) enkargá ku edukashon no-formal a tuma e desishon pa oumentá e supsidio na suheto (Subjectsubsidie). Esaki ta e supsidio ku gobièrnu ta duna pa muchanan di entre e edat di 0 pa 4 aña ku ta bishitá un sentro pre-eskolar ku ta registrá serka i ta keda kontrolá pa gobièrnu.

E otro parti di e maneho relashoná ku maneho di supsidio na suheto ta ku ta bai ehekutá kontrol mas dirigí i kontrolá. Sentronan pre-eskolar ta haña aña 2025 pa atendé i regla e rekisitonan di eksigensia ku gobièrnu ta kontrolá pa kalidat. Den futuro mester kumpli ku e lei di “ kinderopvang “ pa por risibí e supsidio na suheto.

E trayekto di bini ku maneho adaptá pa loke ta trata supsidio pa suheto ta den ehekushon for di ougùstùs último. Tambe ta asina ku e oumento ta drenta na vigor entrante sèptèmber 2024.

Debí na e importansia pa sentronan pre-eskolar i komunidat ta bon informá riba e kambionan ku ta bai tuma lugá, ministerio di ESKD pa medio di Sektor di Kultura i Deporte (SKD) a tene seshon di informashon pa informá tur sentro ku e tin registrá. E sentronan a bin na gran kantidat, demostrando nan interes pa haña e informashon i alabes kompartí algun punto pa gobièrnu tene kuenta kuné den su maneho i su ehekushon. Ministerio ESKD ta sigui traha den bon esfera ku e sentronan, pa na final esaki ta na bienestar di nos muchanan di 0 – 4 aña.

Si bo tin un sentro ku no por a asistí na e seshon di informashon i/òf mester di kualke informashon adishonal por tuma kontakto ku Sektor di Kultura i Deporte (SKD) na Bon Bini Business Center riba  telefòn 562 7369/ 529-7369 i na e-mail adrèsnan sonaline.george@owcs.gov.cw i urlmar.concencion@owcs.gov.cw.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte