Publiká riba 04 Sèptèmber 2017
Seguridat ta un di e puntonan mas importante den mundu di aviashon i Insel Air, meskos ku tur aerolínea, mester kumpli ku esaki. Outoridat di Aviashon Sivil di Kòrsou ta esun ku mester pèrkurá ku tur aerolínea ku ta bula for di nos pais ta kumpli ku esaki. Minister Zita Jesus-Leito, enkargá ku Tráfiko, Transporte i Planifikashon Urbano, ta indiká ku miéntras ta hasi lo máksimo pa e aerolínea por dispone mas pronto posibel di su avion MD80, Insel Air mester kumpli si ku tur regla internashonal di seguridat, promé ku por pone e avion den uso pa transporte di pasaheronan.
Outoridat di Aviashon Civil (CCAA) a reuní durante di e último dianan intensivamente ku ekspertonan di Insel Air pa atendé e petishon pa amplia flota di Insel Air ku un MD 80. E tim di eksperto di CCAA ta hasi tur ku ta posibel i faktibel pa fasilitá Insel Air. Den esaki e tim mester konsiderá semper seguridat na promé lugá .Pa Insel Air kuminsá usa su avion MD80, tin regulashon i prosedura ku Insel Air i CCAA mester tene nan mes na dje, segun tratadonan internashonal.
Pa duna e pèrmitnan nesesario pa por bula e avion MD80 atrobe, e regulashonnan internashonal ta pidi ku CCAA tin dokumentashon riba mantenshon di e avionnan, preparashon di e tripulashon, meskos tambe e plan di ruta ku mester ta sufisiente rendabel pa generá fondo pa mantené e avionnan. Mas lihé Insel Air mes traha riba e puntonan aki i kumpli ,mas lihé nan por kuminsá usa e avion, ku tin mas ku sinku luna ta para sin bula.
CCAA i Gobièrnu di Kòrsou ta suprayá e importansia pa Insel Air amplia su servisio i konektá nos isla ku region. Pa e motibu aki CCAA ta traha huntu ku Insel Air pa e kompania di aviashon por tin e avion MD80 pa bula kuné, basta kumpli ku tur eksigensianan pa garantisá seguridat di pasaheronan.
