Publiká riba 18 Yanüari 2021
WILLEMSTAD – Periodo di aplikashon pa e areglo pa gastunan operashonal fiho (TVL) a sera ofisialmente djaluna último, dia 11 di yanüari i Ministerio di Desaroyo Ekonómiko (MEO) a risibí un total di 397 aplikashon. Mayoria di e petishonnan risibí ta empresanan ku ya a pidi i bini na remarke pa e areglo di NOW. Solamente 23 di e empresanan akí a apliká pa promé bes di kual 18 outomátikamente a keda desaprobá dor di e sistema pa un motibu òf otro.
Tur demas aplikashon, a keda kontrolá pa e tim di MEO pa asina verifiká si e aplikashon ta kompletu i ku e informashon ku a ser yená ta kuadra. Kontrali na e loke a keda komuniká anteriormente, e faktor di kompensashon pa ku e TVL tambe a keda adaptá. Mirando ku a resultá di tin sufisiente fondo pa esaki, e pago lo ta 50% enbes di 30%; pues empresanan ku bini na remarke lo risibí algu mas di sèn.
For di e 372 aplikashonnan risibí, un total di 76 a keda entregá kompletu i lo kuminsá risibí pago di e TVL entrante mañan, djamars 19 di yanüari. E 76 aplikashonnan akí, ta representá un montante di Fls. 3.4 mion total. Pago di e areglo di TVL lo keda ehekutá dor di SVB. Esaki, debí ku SVB ya ta disponé di e informashon bankario verifiká di e empresanan aki debí na e proseso di pago di NOW. Di e demas petishonnan risibí, un total di 103 empresa ainda mester hasi kambio na e montante ku nan a yena i/òf agregá sierto dokumentonan na nan petishon. E empresarionan akí lo risibí un mail ku ta kontené un link pa por hasi e kambio i adaptashonnan nesesario. Despues ku e petishon keda kompletá i ku e informashon keda verifiká, e empresanan akí tambe ta bini na remarke pa risibí pago di e TVL. Mientrastantu, e sobrá 193 aplikashonnan ku MEO a risibí, ta den proseso di verifikashon ainda. Pues MEO ta hasi un yamada na e empresanan akí pa por fabor mas lihé posibel kompletá e aplikashon pa nos por hasi e sobrá pagonan tambe e siman akí.
Empresanan nobo ku a apliká pa e TVL, mester a kana un proseso di chekeo mas largu ku esnan ku ya tabata den sistema. Den siman akí, lo determiná si e empresanan akí tambe ta bini na remarke i ku nan pago ta ser akordá.
Adishonalmente e komishon ku ta duna konseho lo evaluá algun opheshon ku a drenta via e ‘helpdesk’ di TVL (tvl@fondodisosten.org) di parti di empresanan ku a keda desaprobá. Tambe, e komishon lo tira un bista riba e 18 empresanan ku a keda desaprobá outomátikamente dor di e sistema pa evaluá si esaki tin di aber ku nan registrashon na Kámara di Komersio i/òf SVB i si akaso mester hasi kualke korekshon òf ahuste pa ainda nan por bini na remarke.
