Publiká riba 04 Òktober 2024
WILLEMSTAD – Awe, 4 di òktober 2024, Parlamento di Kòrsou a tuma un desishon históriko pa nos pais ku aprobashon unánime di e Lei di kalidat di airu. Ku 15 voto pro i 0 kontra, e lei akí ta un paso fundamental pa protehá i garantisá un futuro saludabel pa nos komunidat i nos medio ambiente.
E lei, introdusí pa Ministerio di Salubridat, Medio Ambiente i Naturalesa bou di direkshon di Minister Gilmar Pisas, ta resultado di un esfuerso kontinuo i dedikashon pa mehorá e kalidat di bida na Kòrsou. Esaki a surgi komo un reakshon direkto riba un desishon di Korte di 2022, ku a indiká ku e normanan pa kalidat di airu mester ta basá riba rekomendashonnan di WHO i stipulá den un lei, en bes di den un dekreto ministerial.
Ministerio di Salubridat, Medio Ambiente i Naturalesa a traha riba e proyekto akí ku urgensia i determinashon, a konsultá ku diferente gremio i kolegionan estatal (Raad van Advies i SER) pa logra un lei ku ta reflehá e nesesidatnan di protehá nos medio ambiente i bienestar di nos hendenan. E lei no solamente ta stipulá normanan bon kla pa kalidat di airu, pero tambe ta pone reglanan ku ta mara kompanianan na pèrmitnan spesífiko i ta hasi posibel pa imponé multa na aktonan ku no ta kumpli ku e lei.
Esaki no ta solamente un viktoria pa e ministerio, pero tambe pa nos pais. Ku aprobashon di e lei, Kòrsou ta demostrá di ta un nashon ku a tuma su responsabilidat ambiental serio i ku ta lanta riba su pia pa sòru pa un medio ambiente mas sano i sigur pa nos tur. E lei ta pone Kòrsou den un ruta pa protehá nos komunidat kontra polushon di airu, benefisiando salú di hende i mehorando e kondishonnan pa desaroyo sostenibel.
Gabinete Pisas II ta sumamente orguyoso ku e logro akí, den apénas un aña i mei despues di e desishon di Korte, i ta sigui komprometé pa sòru pa introdukshon di e lei lo mas pronto posibel, pa asina nos pueblo por kuminsá benefisiá di e protekshon ku e lei ta ofresé. Kòrsou ta un paso mas serka di un futuro mas limpi, mas saludabel i mas sostenibel.
