Publiká riba 13 Òktober 2024
WILLEMSTAD – Dia 11 di aprel 2024, despues di a negoshá kasi un aña riba un akuerdo pa reskate di ENNIA, gobièrnunan di Kòrsou i Sint Maarten, huntu ku Banko Sentral di Kòrsou i Sint Maarten, a firma un akuerdo pa resolushon di e krísis finansiero rondó di ENNIA. Esei tabata i ta nesesario pa evitá un kolèps di nos sistema finansiero i tambe pa evitá e impakto sosial ku esaki lo tin, komo ku un bankarota di ENNIA lo afektá 25.000 asegurado- i penshonadonan aki na Kòrsou i esnan ku ta dependé di nan.
Despues di a yega na un akuerdo, un gobièrnu nobo a sinta na Sint Maarten i a duna di konosé ku e tin un otro bista riba e akuerdo. Esaki inmediatamente a resultá den diferente publikashonnan den media lokal i na Sint Maarten ku a trese duda riba implementashon di e akuerdo di reskate ku a keda firmá dia 11 di aprel 2024, lokual indudablemente a kousa algun intrankilidat bou di e asegurado- i penshonadonan di ENNIA aki na Kòrsou. Sinembargo, Gobièrnu di Kòrsou a duna e aseguradonan di ENNIA i pueblo di Kòrsou públikamente e siguransia ku gobièrnu lo garantisá e derechinan di e asegurado- i penshonadonan di ENNIA, manera palabrá den e akuerdo pa reskate di ENNIA di 11 di aprel 2024. Den e kuadro akí, Gobièrnu a instruí e representantenan apuntá pa Konseho di Minister di Gobièrnu di Kòrsou, Señores Caryl Monte i Miguel Jackson, pa den estrecho kolaborashon ku e ekipo di Banko Sentral di Kòrsou i Sint Maarten sigui hasi tur esfuerso pa evitá kualke impakto negativo riba derechinan di e aseguradonan di Kòrsou.
Dia 18 di sèptèmber último, e representantenan di Gobièrnu di Kòrsou a informá Konseho di Minister ku nan a yega na sierto palabrashonnan adishonal ku representantenan di Gobièrnu di Sint Maarten i esnan di Banko Sentral, riba algun kambio den e akuerdo pa reskate di ENNIA di 11 di aprel 2024 proponé den un “addendum”. Dia 8 di òktober, Staten di Sint Maarten a duna su aprobashon na e akuerdo pa reskate di ENNIA i e “addendum” menshoná ariba. Dia 9 di òktober, sr. Caryl Monte na nòmber di Gobièrnu di Kòrsou a tene un seshon di informashon (“technische briefing”) riba e “addendum” pa miembronan di Parlamento, kaminda tur detaye a wòrdu spliká i preguntanan kontestá. Despues di e seshon splikativo akí, Parlamento di Kòrsou a aprobá e “addendum” di un forma “wall to wall” ku 15 voto pro di tur e miembronan di koalishon i oposishon ku a asistí na e votashon i niun voto kontra.
E mayoria abrumador akí ta resultado di e konklushon di parti di tantu Gobièrnu komo Parlamento ku Kòrsou tin diferente benefisionan grandi pa ENNIA keda eksistí, entre nan un kontribushon di diferente impuestonan na kaha di Gobièrnu di NAf 15 mion pa aña, mantenshon di mas ku 150 kupo di trabou direkto na e kompanianan di ENNIA i tambe e efektonan indirekto ku ENNIA tin riba ekonomia di Kòrsou via di e produkto- i servisionan ku e ta kumpra serka otro kompanianan lokal. Ademas a ser konkluí ku e gastunan adishonal ku ta bini pa kuenta di Kòrsou komo resultado di e “addendum” lo no ta supstansial kompará ku, i lo no afektá, e montante presupuestá ku Kòrsou anualmente lo tin ku kontribuí kuné pa e reskate di ENNIA. Ademas di a yega na reskate di ENNIA, Gobièrnu a logra un porsentahe redusí di 2.9% na lugá di 6.6% riba e fiansanan ku Kòrsou a haña di Hulanda durante e temporada di e pandemia di COVID (2020-2021) den un total di NAf 911 mion. E rebaho akí di 3.7% ta nifiká ku Gobièrnu lo spar alrededor di NAf 400 mion na interes durante un periodo di 20 aña. Pues, un bentaha di mas o ménos NAf 20 mion pa aña durante 20 aña largu.
Esaki klaramente ta un benefisio mas di aprobashon di e akuerdo pa reskate di ENNIA, pasobra e ta baha e peso di NAf 30 mion anual riba presupuesto di Kòrsou pa reskate di ENNIA. Ademas di esaki a sobra tres aktivo grandi den ENNIA ku den e añanan benidero por wòrdu usá pa redusí e impakto riba presupuesto di gobièrnu. Esakinan ta e claim riba Ansary i otronan, e tereno na Mullet Bay na Sint Maarten i e balor di akshonnan di e ENNIA nobo, kual konhuntamente ta representá sufisiente balor pa rekobrá tur òf un gran parti di e medionan ku gobièrnu lo tin ku hinka den e reskate di ENNIA den e próksimo añanan.
Di e manera aki Gabinete Pisas II a yega na un konklushon sumamente satisfaktorio riba e deliberashonnan ku e gobièrnu nobo di Sint Maarten tokante e akuerdo pa reskate di ENNIA i tambe riba e negosiashonnan ku Hulanda tokante refinansiamentu di e fiansanan hasí durante e temporada di COVID (2020 – 2021). Pa kumpli ku e obligashonnan den kuadro di e reskate di ENNIA, tabata di gran importansia pa gobièrnu haña tambe un interes mas abou posibel riba e fiansanan di COVID di kasi 1 bion florin, ya ku Hulanda no kier a duna un eksonerashon pa esakinan. Ámbos meta a keda realisá satisfaktoriamente. Ta p’esei Promé Minister Pisas i Minister di Finansa Silvania ta sumamente orguyoso di e resultado ohochi akí di e dos negosiashonnan ku a wòrdu hibá di forma paralelo ku otro, dor di e mésun tim negoshadó durante un periodo di kasi 1 aña i mei.
Awor tin un akuerdo di reskate efisiente, efektivo i sólido pa e asegurado- i penshonadonan, i tambe e empleadonan di ENNIA. E akuerdo akí ta karga aprobashon di tur e instansianan konserní, esta: Gobièrnu di Kòrsou, Gobièrnu di Sint Maarten, Banko Sentral di Kòrsou i Sint Maarten, Parlamento di Sint Maarten, Parlamento di Kòrsou, Kolegio pa Supervishon Finansiero (Cft) i Gobièrnu di Hulanda. Pueblo di Kòrsou en general, e asegurado- i penshonadonan i empleadonan di ENNIA en partikular por ta kontentu awor ku Gobièrnu di Kòrsou a sa di trese trankilidat bèk den ENNIA i den sektor finansiero, a tuma e medidanan nesesario pa reforsá supervishon di Banko Sentral i tambe a instruí Banko Sentral pa sigui denunsiá na Ministerio Públiko òf persiguí den korte sivil esnan ku a hasi daño na interes di e asegurado- i penshonadonan di ENNIA i nos komunidat.
Finalmente, Gobièrnu ta gradisí presidente i miembronan di Parlamento di Kòrsou, tantu di koalishon i oposishon, inmensamente pa a mira e urgensia di e kaso importante akí i pa e forma diligente ku Parlamento di Kòrsou a tuma desishon riba e “addendum” pa reskate di ENNIA na interes di pais Kòrsou, e 25.000 asegurado i penshonadonan di ENNIA na Kòrsou i tambe e míles di siudadanonan ku ta dependé di nan.
