Publiká riba 10 Yüli 2025
Willemstad – Riba dia 10 di yuli 2025, 11 empleado di ministerio di Tráfiko, Transporte i Planifikashon Urbano (VVRP) a sali pa San Diego, kaminda lo tuma lugá e konferensia anual di Geografic Information System(GIS) pa usuarionan, organisá pa ESRI (Environment Systems Institute). E konferensia, ku lo dura di 12 pa 18 di yüli 2025 i ta duna profeshonalnan di VVRP ku ta usuarionan di e sistema, e oportunidat pa haña mas konosementu i abilidatnan riba diferente área manera:
– e desaroyonan i inovashonnan mas resien den e GIS di ESRI;
– e aplikashon di e GIS di ESRI na otro pais i serka gobièrnunan;
– e uso di Inteligensha Artifishal (AI) i drone komo parti di un GIS;
– e posibilidat pa fortalesé i profesionalisá e uzo di GIS den VVRP.
Importansia di e partisipashon di e konferensia aki pa VVRP
Den VVRP, sistemanan di informashon geográfiko (GIS) ta hañando un ròl mas prominente den formulashon di maneho, prosesonan esensial i tambe tomo di desishon. Hopi área di maneho – manera entre otro maneho di tereno, infrastruktura, maneho di riesgo, supervishon, planifikashon urbano i logístiko – ta depende di informashon geográfiko. Un GIS ta hasi posibel pa kolektá, analisá, i presentá data geográfiko na un manera mas efisiente.
Asina ku e delegashon ta bèk na Kòrsou, lo operashonalisá un plataforma di GIS pa VVRP. E plataforma aki lo sirbi komo un ret di konosementu i innovashon kompartí, ku e meta pa alsa konosementu profeshonal di GIS, stimulá kolaborashon entre organisashonnan i promové desaroyo di aplikashonnan nobo. Tur e esfuerso aki lo mester kontribuí na un funshonamentu mas efektivo i efisiente di e ministerio.
