Publiká riba 23 Òktober 2024
WILLEMSTAD – Komo parti di su promé bishita ofishal na Kòrsou, Su Ekselensia Presidente Chandrikapersad Santokhi di Repúblika di Sürnam, huntu ku Su Ekselensia Promé Minister Gilmar Pisas di Kòrsou, a realisá un bishita di trabou na Ministerio di Desaroyo Ekonómiko di Kòrsou.
Durante di e enkuentro akí, e importansia di e relashonnan komersial bilateral entre Kòrsou i Sürnam a keda enfatisá, i a tuma un paso importante pa fortalesé e kolaborashon ekonómiko. Esaki a sosodé a base di firmamentu di e akuerdo (raamwerkovereenkomst) pa un ‘Partial Scope Trade Agreement’ entre e dos paisnan. E akuerdo a keda firmá pa Su Ekselensia sr. Albert Ramdin, Ministro di Asuntunan Eksterior, Komèrsio Internashonal i Kolaborashonnan Internashonal (BIBIS) di Sürnam, i Su Ekselensia r. Charles Cooper, Minister di Desaroyo Ekonómiko di Kòrsou, den presensia di e Presidente di Sürnam i Promé Minister di Kòrsou.
Despues di e firmamentu a kontinuá ku un presentashon di buki kaminda a ofresé dos obra, esta e buki “Faya Lobi” di sra. Ange Jessurun i e buki “Groene Olie” di sr. Stijn Janssen. E bukinan ta reflehá kresementu di e lasonan kultural i ekonómiko entre Kòrsou i Sürnam. Esaki ta konta prinsipalmente pa e buki “Groene Olie”, ya ku e ekspektativanan ta ku petroleo mas i mas lo bai hunga un ròl grandi den e relashonnan ekonómiko entre e dos paisnan.
Su Ekselensia Promé Minister Pisas a klousurá e enkuentro ku algun palabra final di gradisimentu pa e bishita di Presidente di Sürnam, i a enfatisá ku e akuerdo akí i e kolaborashon ku a keda fortifiká, lo forma e base pa un futuro próspero pa tantu Kòrsou komo Sürnam.
