Publiká riba 22 Yanüari 2021
WILLEMSTAD – Periodo di aplikashon pa NOW i TBZO pa luna di yanüari 2021 ta keda prolongá te ku djaluna, 25 di yanüari pa 4’or di atardi. Esaki ta nifiká, ku tantu esnan ku mester hasi un petishon nobo komo esnan ku mester hasi adaptashon di nan datonan via di e link ku nan a risibí tin e espasio pa hasi esaki te ku djaluna awor.
Motibu pa e prolongashon aki ta, ku den e dianan tras di lomba, Ministerio di Desaroyo Ekonómiko (MEO) a bin ta risibí reakshon di diferente empresa i empresario ku, pa un motibu òf otro, tabata enkontrá difikultat pa kompletá nan petishon di sosten empresarial pa e luna aki.
Despues di a investigá e situashon un poko mas a fondo, a bin konstatá problemanan tékniko den e sistema digital ku ta keda usá pa prosesá e petishonnan di sosten empresarial. Pues ta trata aki di petishonnan di tantu sosten na empresarionan individual (TBZO), supsidio salarial (NOW) pero tambe sosten pa yuda empresanan ku gastunan operashonal (TVL).
Debí na e interupshon tékniko, empresarionan ku mester a hasi korekshon pa ku nan aplikashon di TVL tampoko por a hasi esaki. Pues, pa loke ta trata empresanan akí, MEO ta partisipá ku e link aki tambe ta keda aktivo di moda ku mas pronto posibel e korekshonnan nesesario por keda hasí.
MEO ta urgi tur empresa i empresario pa por fabor hasi nan aplikashon i/òf adaptashon di datonan promé ku e periodo di yanüari sera. Na tur empresa i empresario ku a konfrontá kualke inkumbiniensia pa motibu di e problemanan tékniko, MEO ta ofresé su mas sinsero diskulpa.
