Willemstad – Departamentu di Pèrmit di Ministerio di Desaroyo Ekonómiko ke rekordá tur interesado ku tin intenshon pa bende produkto riba rutanan di seú (Bándariba i/òf Bándabou) 2025 ku mester hasi petishon pa un pèrmit temporal pa ‘ventvergunning’ òf ‘standplaatsvergunning’. E último fecha pa entregá petishon pa pèrmit pa benta durante e marchanan di seú ta 31 di mart 2025 pa marcha di Bándariba i 14 di aprel pa marcha di Bándabou.
Petishon pa pèrmit temporal
Aplikantenan ku ta deseá pa bende algu riba ruta di forma ambulante durante marchanan di seú 2025 mester apliká pa un ‘ventvergunning’ temporal (pèrmit pa benta ambulante). I personanan ku ta deseá pa bende produkto for di un kantina mobil mester hasi petishon pa un ‘standplaatsvergunning’ temporal (pèrmit pa benta for di un kantina mobil). Komersiantenan ku tin pèrmit pa un puesto fiho riba e ruta tambe mester apliká pa un pèrmit spesífiko pa marchanan di Seú 2025.
Si bo ta deseá pa bende kos tantu riba e ruta di seú di Bándariba i Bándabou mester hasi petishon pa kada un di e rutanan aki separá. Si bo a bende kos kaba riba ruta di seú den añanan anterior tambe bo mester apliká pa un pèrmit spesífiko pa Seú 2025.
Kon pa apliká pa pèrmit?
Pa por hasi petishon pa ámbos pèrmit (vent- òf standplaatsvergunning temporal) pa temporada di Seú 2025 mester akudí na Lokèt di Pèrmit, departamentu Intake, na Saliña 127 pegá ku Subway di djaluna pa djaweps entre 08:00 – 15.00 i djabièrnè entre 8:00 -12:00. Bishitá loketdigital.gobiernu.cw i skohe sea ‘Standplaatsvergunning’ òf ‘ventvergunning’ pa bo ta debidamente informá tokante rekesitonan ku bo mester pa hasi ambos petishon.
Pa mas informashon, por fabor tuma kontakto libremente ku Lokèt di Pèrmit na telefòn (5999) 433-3123 òf via WhatsApp (5999) 433-3127.
