Publiká riba 19 Yanüari 2024
WILLEMSTAD – Resientemente e personal di Sentro di Detenshon i Korekshon Kòrsou (SDKK) ku ta sigui e estudio di Voortgezette Penitentiaire Inrichtings Opleiding (VPIO) na ORV a risibi komo modulo diferente leinan i tratadonan di derechi humano.
Den kuadro di esaki, señor Urny Floran komo èks direktor di prizòn tabata orador invitá pa duna e materia akí a basé di su konosementu i eksperensia amplio. Den e seshon akí e tópikonan ku a ser tratá tabata tratadonan internashonal, leinan lokal i tambe diferente proseduranan i leinan pa ku derechi humano i di detenidonan. Tambe señor Urny Floran a elaborá riba vários puntonan di atenshon ku mester tene kuenta kuné na momentu ku bo ta ehersé bo labor komo personal di prizòn. Por mira bèk riba un seshon informativo i interaktivo kaminda e kursistanan di VPIO por a amplia nan konosementu. Mirando e importansia di tópiko di derechi humano i tratadonan internashonal, lo bai sigui duna mas di e seshonnan akí na e personal di prizòn.
Gerensia di SDKK kier a gradisí señor Urny Floran pa su kontribushon duná na kursistanan di VPIO i gerensia lo sigui invertí riba formashon i desaroyo di nos personal.
