Publiká riba 02 Aprel 2026
Willemstad – Djárason, 1 di aprel 2026, Konseho di Minister a haña un presentashon di e proyekto pilóto pa Maneho di Supsidio i su programa di eksigensianan di e Ministerio di Desaroyo Sosial, Labor i Bienestar (SOAW), ku ta forma parti di Pakete di Pais (‘Landspakket’). Sra. Glenda Aniceta, Sekretario General a.i. di Ministerio di Desaroyo Sosial, Labor i Bienestar huntu ku ekspertonan eksterno Peter Bex i Arthur Izeboud a duna e presentashon na Konseho di Minister.
A kuminsá e presentashon ku un evaluashon kòrtiku i e ambishonnan komun ku Ministerio di SOAW a indentifiká: un posishon digno pa hende grandi, oportunidatnan igual riba merkado laboral, koheshon sosial outosufisiente, famianan i hubentut fuerte i un ret di siguridat sosial fuerte. Seguidamente a para ketu na e trayekto ku e ministerio a kana den pasado te ku awor pa yega na un maneho di supsidio ku mira riba integrashon di esaki den maneho general di e ministerio.
Huntu ku e maneho di supsidio a presentá tambe e programa di eksigensianan (‘programma van eisen’) ku ta kompañá e maneho di supsidio. Sra. Aniceta a kompartí ku ya a sinta ku tur e organisashonnan ku aktualmente ta risibí supsidio di e Ministerio di SOAW pa presentá e proyekto pilóto ku bista riba introdukshon ofisial di e maneho di supsidio i programa di eksigensianan.
Sra. Aniceta a ser akompañá pa sr. Peter Bex, sr. Arthur Izeboud, sr. Rudsel Sophia i sr. O’dennis Daal.
