Publiká riba 24 Òktober 2024
WILLEMSTAD – Riba invitashon di e Kònsùl General di Sürnam na Kòrsou, sra. Christa Zuiverloon, Presidente di Repúblika di Sürnam, Su Ekselensia Chandrikapersad Santokhi, a partisipá, huntu ku Promé Minister di Kòrsou, sr. Gilmar Pisas, na presentashon di e ‘Surinaams Diaspora Instituut Curaçao’. E enkuentro a tuma lugá den kuadro di e bishita ofishal di e presidente di Sürnam na Kòrsou. Minister di Asuntunan Eksterior, Komèrsio Internashonal i Kolaborashonnan Internashonal (BIBIS) di Sürnam, Su Ekselensia Albert Ramdin, tambe tabata presente na e okashon akí.
Promé Minister Pisas a ekspresá su apresio pa e kontribushon di e komunidat surinameño na sosiedat di Kòrsou. El a enfatisá ku Kòrsou ta habrí pa mas kolaborashon riba diferente área, inkluso komèrsio, turismo, petroleo i gas, deporte i kultura.
Durante di su diskurso, presidente di direktiva di e instituto, sr. Mirto F. Murray, a enfatisá riba importansia di e diáspora pa ku desaroyo di Sürnam, pero tambe su kontribushon na e konstrukshon ekonómiko i sosial di Kòrsou. “E diáspora sürnam ta hunga un ròl krusial den e kresementu di Sürnam, i tambe ta kontribuí di forma signifikante na kresementu di Kòrsou”, segun sr. Murray.
Presidente Santokhi a duna vários ehèmpel di posibilidatnan pa kolaborá ku Sürnam i dikon ta interesante pa invertí den Sürnam. E lasonan fuerte entre ámbos pais i nan komunidatnan ta ofresé oportunidatnan pa mas kolaborashon. “Hunto nos por traha na benefisio mutuo pa tur dos nashon,” e mandatario a bisa.
Despues di e diskurso, e públiko presente tabatin e oportunidat pa interkambiá di idea ku e presidente.
E Instituto di Diáspora ke logra pa na kuminsamentu di otro aña organisá un enkuentro ku e diáspora surinameño na Kòrsou. Durante di e reunion akí lo diskutí riba opshonnan konkreto pa ku traspaso duradero di konosementu i tambe koperashon, basá riba un inventarisashon di e nesesidatnan di e diáspora na Kòrsou i e nesesidatnan na Sürnam.
E evento tabata un gran éksito.
