Publiká riba 16 Òktober 2024
WILLEMSTAD – Presidente di Sürnam Su Ekselensia sr. Chandrikapersad Santokhi i su pareha sra. Mellisa Santokhi-Seenacherry (First Lady) lo ta di bishita na Kòrsou riba djamars 22 i djárason 23 di òktober benidero riba invitashon di Promé Minister sr. Gilmar Pisas.
E bishita akí lo tin un nifikashon históriko, debí ku ta promé biaha ku un Presidente di Repúblika di Sürnam ta hasi un bishita ofisial na Kòrsou.
E bishita ta tuma lugá den kuadro di fortifikashon di e koperashon regional riba tereno di entre otro komèrsio, turísmo, zeta, gas, deporte i kultura.
Gobièrnu di Kòrsou ta konsiderá esaki un oportunidat balioso pa reforsá e relashonnan bilateral entre Kòrsou i Sürnam.
Di Sürnam tambe lo tei sr. Albert Ramdindi, Minister di Asuntunan Eksterior, Komèrsio Internashonal i Kolaborashonnan Internashonal (BIBIS).
Promé Minister sr. Gilmar Pisas, huntu ku sra. Christa Zuiverloon, Kònsùl General di Sürnam na Kòrsou, lo kompañá e Presidente durante di su bishita.
Den e programa ofisial di e Presidente tin entre otro bishitanan planiá serka Gobernador di Kòrsou, Konseho di Minister i Parlamento di Kòrsou.
Tambe tin un programa pa e ‘First Lady’ kaminda lo pone atenshon en partikular riba e tema di salú mental serka mucha, hóbennan i adulto.
Esaki ta un tema ku sra. Mellisa Santokhi-Seenacherry a bin ta dediká hopi atenshon na dje.
Tambe lo tin bishitanan di trabou pa por realisá mas koperashon riba desaroyo ekonómiko i kultural.
Gobièrnu ta kontentu di por bai yama e Presidente i su delegashon bon biní na Kòrsou i asina krea oportunidat pa por traha aun mas serka ku otro pa sigui fortalesé e relashon entre Kòrsou ku Sürnam.
