Notisia

Minister ta risibí grupo di dosente relashoná ku programa “train-the-trainer” den Enseñansa relashoná ku Sivismo (Burgerschapsonderwijs)

WILLEMSTAD – Minister di Enseñansa, Siensia, Kultura i Deporte  (ESKD) sr. Sithree van Heydoorn a risibí un grupo di dosente ku ta forma parti di un programa train-the-trainer  relashoná ku formashon i edukashon di sivismo den enseñansa (na hulandes burgerschapsonderwijs). E programa aki ta den kuadro di e Programa Mehorashon di Enseñansa, ku ta enfoká riba aktividatnan di profeshonalisashon pa sigui fortalesé e kapasidat di dosentenan. “Kalidat di nos enseñansa ta kai lanta ku kalidat di esun  pará dilanti di klas,” segun  minister Sithree van Heydoorn. “P’esei nos ta keda invertí den nos dosentenan.”

Sivismo:  – fundeshi di nos komunidat: Edukashon di sivismo ta un parti esensial den e formashon di nos yunan den enseñansa. Skolnan tin un papel importante pa yuda e hóbennan akí desaroyá konosementu, aktitut i e abilidatnan nesesario pa por partisipá den nos komunidat na un manera positivo i konstruktivo. Kiko ta balornan di bon komportashon? Stima bo pais, respetá derechinan humano di kada siudadano, konosé reglanan di demokrasia i étika. Pa djis menshoná un par. Siudadania (Burgerschap) ta mas ku “Tene Kòrsou limpi i no tira sushi abou.” E ta tambe desaroyo sostenibel i atenshon pa medio ambiente i naturalesa. Hasiendo esaki, skolnan ta prepará e hóbennan pa tin un ròl mas aktivo komo siudadanonan den un sosiedat ku ta diverso i ta den kambio kontinuo.

Sinembargo, implementashon di e tema aki den lès no ta dje fásil ei. Dosentenan tin basta pregunta: Kon ta e manera mas efektivo pa hasi esaki? ‘Maatschappijleer’ komo materia no ta meskos ku Sivismo (burgerschap), komo ke esaki no ta den un materia so, pero tur materia tin aspektonan di e tema aki. P’esei Dosentenan ta buska inspirashon, orientashon i instrumentonan práktiko pa duna e materia aki den skol.

Un kolaborashon internashonal: Pa duna kontesta na e nesesidat aki, Fontys Educatie (Tilburg, Hulanda), bou di enkargo di  Ministerio di Enseñansa, Siensia, Kultura i Deporte (ESKD), i den kolaborashon ku Universidat di Kòrsou (UoC), a desaroyá un programa spesial. Fontys ta uza e konsepto di profeshonalisashon konosí komo Special Interest Group (SIG): un grupo di dosente motivá i kompetente ta bira eksperto den un tema edukativo spesífiko, pa despues nan por inspirá i guiá nan koleganan paden i pafó di nan skol.

E programa ta pone énfasis riba e kontenido, didáktika i dimenshon pedagógiko di edukashon di sivismo. A skohe dosente di havo/vwo, vsbo i sbo pa partispá. Ta prepará nan pa nan por tuma un ròl komo lider, trainer i inspiradó. Tufan Naderi dosente di Fontys, a hunga un papel importante den desaroyo di e programa.

E struktura di e programa: E programa ta konsistí di algun fase. Den e promé fase, e dosentenan lo partisipá den un programa intensivo di un siman na Hulanda. Despues, nan lo sigui traha riba tareanan konkreto, ku guia i apoyo di mentor i coach. Siguiente aña lo tene un seshon akí na Kòrsou bou di direkshon di Fontys. Despues di kompletá e programa ku éksito, e partisipantenan lo risibí un sertifikado ku puntonan di krédito ofisial.

Fruta di un kolaborashon fuerte: E programa aki ta un di e frutanan di e Memorandum of Understanding (MoU) ku a firma  aña pasá entre Fontys i UoC.

Minister van Heydoorn a ekspresá su satisfakshon  ku e desaroyo aki: “Ku e kolaborashon aki, nos ta fortalesé no solamente nos dosentenan, sino tambe futuro di nos país. Mi ta spera ku boso, komo pioneronan di edukashon di sivismo, lo sigui inspirá otro pa hasi e mesun kos’.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte