WILLEMSTAD – Ku gran satisfakshon, Minister Roderick Middelhof i su ministerio, Ministerio di Desaroyo Ekonómiko (MEO), por mira bèk riba un aña fruktífero pa loke ta trata prosesamentu di pèrmitnan ekonómiko. Konforme lei, MEO ta e ministerio enkargá pa otorgá pèrmitnan ekonómiko na Kòrsou. Miéntras ku Lokèt di Pèrmit ta fungi komo e Front Office pa hasi petishon i entrega di e pèrmitnan ekonómiko aki, MEO tin e enkargo pa evaluá, aprobá òf ninga e petishonnan aki.
For di despues ku Minister Middelhof a tuma e maneho di MEO over, un maneho nobo a keda anunsiá kaminda ta apliká un término uniforme di tres (3) siman pa tur instansia ku mester duna konseho den kuadro di pèrmitnan di horeca. Na momento ku no risibí e konseho denter di e periodo stipulá, MEO ta tuma desishon riba e pèrmit a base di e informashon ku tin disponibel. E maneho nobo aki a duna su fruta i tur retraso den pèrmitnan di horeca a keda eliminá.
En total, MEO a risibí un kantidat di 2.828 petishon pa diferente pèrmitnan ekonómiko den aña 2025 di kual 2.671 (94%) a keda prosesá i 157 (6%) ta den tratamentu. Minister Middelhof i MEO ta mira e sifranan aki komo fruta di tur e diferente esfuersonan ku e ministerio a bin ta hasi den e último añanan pa trese mehorashon i un mihó servisio.
Aki ta sigui un bista di e kantidat di petishonnan pa pèrmit ku MEO a risibí durante 2025 i prosesá nan, repartí den e diferente kategorianan di pèrmit ekonómiko:
| Kategoria di pèrmit | Risibí | Prosesá | Den tratamentu |
| Vestigingsvergunning | 2.190 | 2.162 | 28 |
| Filiaal vestigingsvergunning | 30 | 30 | – |
| Standplaats (Temporal/Permanente) | 334 | 265 | 69 |
| Ventvergunning (Temporal/Permanente) | 93 | 83 | 10 |
| E-Zone | 9 | 9 | – |
| Horeca | 157 | 110 | 47 |
| Intrekkingen | 15 | 12 | 3 |
| Total | 2.828 | 2.671 | 157 |
Minister Middelhof ta keda enfatisá ku mehorashon di servisio di MEO na siudadanonan i empresarionan ta keda su prioridat number un i ta sigui dal stapnan grandi pa yega na un proseso efisiente i struktural pa otorgá pèrmitnan ekonómiko.
