Publiká riba 01 Novèmber 2024
WILLEMSTAD – Desde ku a kambia e konstelashon di Gabinete Pisas II, a akordá ku e puesto di Minister di Desaroyo Ekonómiko (EO) i di Minister di Desaroyo Sosial, Labor i Bienestar (SOAW) lo ta okupá pa kandidatonan presentá pa e miembro independiente di Parlamento, sra. Z. Jesus-Leito, i pa partido Kòrsou Esun Mihó (KEM).
Di akuerdo ku e Lei di Integridat di (kandidato pa bira) Minister, Promé Minister, komo formador di gabinete, ta enkargá ku e investigashon ku lo mester kondusí na un proposishon pa ku nombramentu di e ministernan nobo, di forma ku por remplasá e ministernan interino ku akutalmente ta dirigí e dos ministerionan ariba menshoná.
Promé Minister/Formador di gabinete a hasi petishon na diferente servisio involukrá pa realisá e investigashonnan preskribí den kuadro di e lei pa loke ta trata e kandidatonan proponé pa e puestonan di minister vakante. E resultadonan di e investigashon lo ser informá na Promé Minister/Formador di gabinete i na Gobernador. Promé Minister/Formador di gabinete no lo promové òf presentá un kandidato komo minister, si resultado di e investigashon no ta kuadra ku e kriterianan.
E investigashonnan den e kuadro di e ministernan kandidato ainda no a kaba. Ora ku finalisá e investigashonnan rekerí, Promé Minister/Formador di gabinete lo evaluá si e kandidatonan proponé ta kumpli ku e kriterianan i si por presentá nan na Gobernador pa keda nombrá komo minister.
Resultado di e investigashon, kontenido di e diálogonan i korespondensia entre Promé Minister i e kandidatonan ta konfidensial. Fuera di e Gobernador, Promé Minister no lo duna informashon na otro partido tokante kontenido di e prosedimentu.
