Publiká riba 21 Òktober 2025
WILLEMSTAD – Minister-President Gilmar Pisas a risibí awe e Tim di Maneho i Hunta di Komisario di Curoil N.V. pa un bishita di sera konosí i pa un diálogo tokante e direkshon stratégiko di e kompania.
Curoil N.V. ta un empresa gubernamental ku tin un ròl stratégiko komo distribuidor nashonal di kombustibel na Kòrsou. E kompania ta responsabel pa importá, depositá, distribuí i bende kombustibel den i pafó di Kòrsou.
Durante e reunion, e Tim di Maneho a duna un presentashon tokante e direkshon stratégiko di Curoil, ku ta enfoká riba kresementu kontinuo di su aktividatnan nashonal i regional. Komo empresa di energia, Curoil ta aktivamente trahando riba e transishon energétiko pa forma i hasi uzo di mas produkshon ku ta menos dañino pa nos medio ambiente. Na e momentunan aki, Curoil ta trahando riba algun proyektonan grandi, inkluso e inisiativa “Go Clean & Green”, e proyekto Helios pa desaroyá un terminal di kombustibel independiente riba tereno di Isla, i e proyekto BOPEC na Boneiru. E proyektonan aki ta ofresé oportunidat pa kresementu di e kompania i pa fortalesé e posishon di Curoil den region.
Tantu e Tim di Maneho komo e Hunta di Komisario a enfatisá nan kompromiso ku otro pa sigui traha riba e profesionalismo di e kompania. Promé Minister Pisas a ekspresá su apresio pa e manera transparente i e manera kon ta atendé ku e futuro di Curoil:
“E direkshon ku Curoil ta tuma – ku enfoke riba sostenibilidat, efisiensia i fortifikashon di nan operashon regional – ta aliniá ku nos vishon nashonal pa un suministro di energia fuerte i limpi.”
Na final a wordu akordá pa sigui traha hunto pa fortalesé e relashon entre Gobièrnu i Curoil, ku meta pa garantisá un suministro di energia stabil, pagabel i sostenibel pa e generashonnan ku ta bin.
