Publiká riba 24 Novèmber 2017
Den Haag – Na okashon di e bishita di Promé Minister Rhuggenaath na Hulanda pa sera konosí ku Gabinete Rutte III, e promé minister di Kòrsou a bishitá alkaldenan di Den Haag i Rotterdam pa yega na un mihó bista riba riba e posibilidatnan pa koperashon.
Den presensia di Minister Plenipotensiario di Kòrsou, Promé Minister Rhuggenaath a topa ku e alkalde nobo di Den Haag, señora Krikke. Durante e kombersashon sr. Rhuggenaath a indiká ku e ta deseá pa intensifiká e kontakto ku Den Haag tambe den kuadro di perspektivanan riba tereno ekonómiko. Komo siudat internashonal di pas i hustisia Den Haag ta e base pa un gran kantidat di organisashon i empresa. Den área di inovashon, sigur pa loke ta trata digitalisashon, Den Haag a logra bon resultado e último añanan for di kual Kòrsou por siña. E alkalde sigur ke promové e relashonnan mirando e gran kantidat di yu di Kòrsou ku ta biba den e siudat aki.
Mas aleu Promé Minister Rhuggenaath a biaha pa Rotterdam kaminda el a bishitá e alkalde, sr. Aboutaleb. Riba invitashon di e alkalde, e CEO di e empresa di haf di Rotterdam sr. Castelein tambe a partisipá mas lat na e enkuentro. Den pasado Alkalde Aboutaleb i Promé Minister Rhuggenaath a hiba kombersashonnan, entre otro tokante di e desaroyo den haf di Rotterdam. Ademas, e aña aki Minister di Desaroyo Ekonómiko di Kòrsou, sr. Steven Martina tambe a bishitá e haf di Rotterdam. E outoridatnan portuario di Rotterdam ta dispuesto pa sigui kombersá tokante kon nan por sirbi Kòrsou den kuadro di e posishon logístiko di pais Kòrsou.
